கனடாவில் 6 வயது சிறுவன் மாயமாகி ஓராண்டு: தீவிர விசாரணையில் காவல்துறை!

கனடாவின் தெற்கு அல்பெர்ட்டா பகுதியில் 6 வயது சிறுவன் டேரியஸ் மெக்டூகல் அடர்ந்த காட்டுப்பகுதியில் மாயமாகி ஓராண்டு நிறைவடைந்துள்ள நிலையில், அவனைக் கண்டறியும் தீவிர புலனாய்வு விசாரணை தொடர்ந்து நடைபெற்று வருவதாக கனடிய காவல்துறை தெரிவித்துள்ளது.

கடந்த 2025-ஆம் ஆண்டு செப்டம்பர் 21 அன்று, குரோஸ்நெஸ்ட் பாஸ் பகுதிக்கு அருகில் உள்ள ஐலேண்ட் லேக் முகாமிற்கு சிறுவன் டேரியஸ் தனது குடும்பத்தினருடன் சுற்றுலா சென்றிருந்தான்.

குடும்பத்தினருடன் உலா சென்ற சிறுவன், முகாமிற்குத் திரும்பும் வழியில் திடீரென மாயமானான். ஆட்டிசம் குறைபாடு கொண்ட அச்சிறுவன், பேசக்கூடியவன் என்ற போதிலும் தனது பெயரை யாராவது கூப்பிட்டால் உடனடியாகப் பதிலளிக்கும் பழக்கம் இல்லாதவன் எனக் காவல்துறை தரப்பில் தெரிவிக்கப்பட்டது.

இதனைத் தொடர்ந்து அல்பெர்ட்டா, பிரிட்டிஷ் கொலம்பியா மற்றும் சஸ்காட்செவன் ஆகிய மாகாணங்களைச் சேர்ந்த நூற்றுக்கணக்கான தன்னார்வலர்கள் 11 நாட்கள் தொடர்ந்து காட்டுப்பகுதியில் தீவிர தேடுதல் வேட்டையில் ஈடுபட்டனர்.

எனினும் சிறுவன் குறித்து எந்தத் தடயமும் கிடைக்காததால் அதிகாரப்பூர்வத் தேடுதல் பணி தற்காலிகமாக நிறுத்தப்பட்டது. சிறுவன் மாயமாகி ஓராண்டு நிறைவடைந்ததை முன்னிட்டு திங்கள்கிழமை அல்பெர்ட்டா காவல்துறை அறிக்கை ஒன்றை வெளியிட்டுள்ளது.

அடர்ந்த காட்டுப்பகுதியில் மேற்கொள்ளப்பட்ட பரந்த தேடுதல் பணி நிறைவடைந்தாலும், பின்னணியில் புலனாய்வுப் பணிகள் தொடர்ந்து நடைபெற்று வருகின்றன.

டேரியஸ் காணாமல் போனமை குறித்த விடைகளைக் கண்டறியக் கிடைத்த தகவல்களை ஆய்வு செய்து, சாத்தியமான அனைத்துக் கோணங்களிலும் அதிகாரிகள் தொடர்ந்து விசாரணை நடத்தி வருகின்றனர்.

இதுவரை பொதுமக்களிடம் இருந்து 70-க்கும் மேற்பட்ட தகவல்கள் பெறப்பட்டு விசாரிக்கப்பட்டுள்ளதாகக் காவல்துறையினர் தெரிவித்தனர்.

சிறுவன் டேரியஸ் மாயமானது குறித்து அல்லது அவனைக் கண்டறிவது குறித்துச் சிறிய தகவல் தெரிந்திருந்தாலும் பொதுமக்கள் உடனடியாக 403-562-2866 என்ற எண்ணில் குரோஸ்நெஸ்ட் பாஸ் காவல்துறையைத் தொடர்பு கொள்ளுமாறு கேட்டுக்கொள்ளப்பட்டுள்ளனர்.