ஹொங்ஹொங்கில் சிக்கியிருக்கும் இலங்கை அகதியை அடித்து நொறுக்கிய பொலிசார்: அவருக்காக வித்தியாசமான முறையில் நிதி திரட்டும் சட்டத்தரணி

சர்வதேச அளவில் தேடப்படும் நபர் ஒருவருக்கு உதவியதற்காக இலங்கைத் தமிழர்கள் உட்பட அகதிகள் சிலரும், அவர்களது வழக்கறிஞர் ஒருவரும் துன்புறுத்தப்பட்ட விடயம் நினைவிருக்கலாம்.

அமெரிக்க உளவுத்துறை ரகசியங்களை வெளியிட்டதற்காக சர்வதேச அளவில் தேடப்பட்ட Edward Snowden என்னும் அமெரிக்கருக்கு அடைக்கலம் கொடுத்த சில அகதிகளும், அவர்களது சட்டத்தரணியான மொன்றியலைச் சேர்ந்த Robert Tibbo என்பவரும், ஹொங்ஹொங் அதிகாரிகளால் சொல்லொணா தொந்தரவுகளுக்கு ஆளாக்கப்பட்டார்கள்.

மனித உரிமைகள் வழக்கறிஞரான Robert, Edward Snowdenக்கு அடைக்கலம் கொடுக்க முடிவு செய்த போது, அவரை யாரும் கண்டுபிடிக்க இயலாத ஒரு இடத்தில் அவரை மறைத்துவைக்க முடிவு செய்தார்.

அது உலகின் பணக்கார நகரமான ஹாங்காங்கின் ஒரு பகுதியில் அமைந்துள்ள ஆயிரக்கணக்கான அகதிகள் வாழும் பகுதி. அங்குதான் பிலிப்பைன்சைச் சேர்ந்த அகதிக் குடும்பம் ஒன்றும் இலங்கை அகதிகள் சிலரும் வசித்து வந்தனர்.

Vanessa Mae Rodel, Supun Thilina Kellapatha, Nadeeka Nonis மற்றும் Ajith Pushpa Kumara என்னும் அகதிகளின் உதவியை, அவர்களது வழக்கறிஞரான Robert நாடியபோது, அவர்கள் தங்களைப் போலவே இன்னொரு நாட்டில் சிக்கித் தவிக்கும் ஒரு நபராக கருதி Snowdenக்கு அடைக்கலம் கொடுக்க முன் வந்தனர்.

ஆனால் அது அவர்களுக்கு பெரும் சிக்கலாக முடிந்தது.

Snowdenக்கு அடைக்கலம் கொடுத்ததற்காக அவர்களை விசாரித்த ஹாங்காங் அதிகாரிகள், அவர்களுக்கு கொடுக்கப்பட்டு வந்த சிறிய உதவித் தொகையையும் நிறுத்தினர். அதன்பின் அவர்களுக்கு எந்த உதவியும் செய்ய மறுத்ததோடு, அகதிகள் துன்புறுத்தப்பட்டனர், அவமானப்படுத்தப்பட்டனர். உடனடியாக அவர்களது புகலிடக் கோரிக்கைகள் விசாரிக்கப்பட்டு நிராகரிக்கப்பட்டன. அவர்களுக்கு வேலை செய்யும் உரிமையும் மறுக்கப்பட்டது.

எப்படியாவது அவர்களை ஹொங்ஹொங்கிலிருந்து மீட்டுவிடவேண்டும் என Robert எடுத்த முயற்சியின்பேரில், அவர்கள் அனைவரும் கனடாவின் உதவியை நாடினார்கள்.

கனடாவின் உதவியின்பேரில், முதலாவதாக 2019ஆம் ஆண்டு, அக்டோபர் மாதம், Vanessaவையும், அவரது மகளையும் அகதிகளாக கனடா ஏற்றுக்கொண்டது.

பின்னர், சமீபத்தில், அதாவது, சென்ற மாதம் Supun, Nadeeka மற்றும் அவரது பிள்ளைகள் கனடாவுக்கு குடியேறினார்கள்.

ஆனால், Snowdenக்கு பாதுகாவலர் போல் செயல்பட்ட Ajith Pushpa Kumara மட்டும் இன்னமும் ஹொங்ஹொங்கிலேயே இருக்கிறார். இந்நிலையில், சந்தைக்குச் சென்ற அவரைப் பிடித்த ஒரு கூட்டம் பொலிசார், போலி ஆவணங்கள் வைத்திருப்பதாகக் கூறி, 15 நிமிடங்களுக்கு அவரை அடித்து உதைத்திருக்கிறார்கள்.

உயிர் பயத்திலிருக்கிறேன் என்று கூறும் Pushpa Kumara, என்னைப் பிடித்து இலங்கைக்கு நாடுகடத்திவிடுவார்கள் என பயந்திருக்கிறேன், நான் இங்கும் பாதுகாப்பாக இல்லை என்கிறார்.

கனடாவின் பதிலுக்காக நீண்ட காலமாக காத்திருக்கும் அவருக்கு உதவுவதற்காக வித்தியாசமான ஒரு விடயம் செய்ய இருக்கிறார் சட்டத்தரணியான Robert.

அதன்படி, உலகமெங்கும் தேடப்படும் Snowden ரஷ்யாவிலிருக்கும்போது தான் எடுத்த, இதுவரை வெளியாகாத புகைப்படங்கள் சிலவற்றை ஏலம் விட்டு, அதிலிருந்து கிடைக்கும் பணத்தை அகதிகளை மீட்பதற்காக பயன்படுத்த இருக்கிறார் Robert.