கனடாவில் கொலையுடன் தொடர்புடைய நபர்களை தேடும் பொலிஸார்

 கனடாவின் நயாகரா நீர்வீழ்ச்சி பகுதியில் கடந்த வாரம் இடம்பெற்ற துப்பாக்கிச் சூட்டுச் சம்பவத்தில் நபர் ஒருவர் கொல்லப்பட்ட வழக்கில், சந்தேகநபர்களான இருவரைக் பொலிஸார் உத்தியோகபூர்வமாக அடையாளம் கண்டுள்ளதுடன் அவர்களைத் தீவிரமாகத் தேடி வருகின்றனர்.

ஜூலை 16 இரவு 9 மணியளவில் தொரோல்ட் ஸ்டோன் அமைந்துள்ள வீடு ஒன்றில் துப்பாக்கிச் சூடு நடந்ததாகக் கிடைத்த தகவலையடுத்து அதிகாரிகள் சம்பவ இடத்திற்குச் சென்றுள்ளனர்.

அங்கு துப்பாக்கிச் சூட்டுக்கு இலக்கான நபர் மருத்துவமனைக்குக் கொண்டு செல்லப்பட்ட போதிலும், சிகிச்சை பலனின்றி உயிரிழந்தார்.

இந்தத் திட்டமிடப்பட்ட துப்பாக்கிச் சூட்டுச் சம்பவத்தில் தொடர்புடைய சந்தேகநபர்கள் இரண்டாம் நிலை கொலைக் குற்றச்சாட்டின் கீழ் தேடப்பட்டு வருகின்றனர்:

23வயதான மரூஃப் பாங்கி : மெலிந்த உடலமைப்பு மற்றும் இருண்ட நிறமுடைய இவர், தாடி மற்றும் தலைமுடியின் தோற்றத்தை மாற்றியமைக்க வாய்ப்புள்ளதாக பொலிஸார் எச்சரித்துள்ளனர்.

30 வயதான ஜோஸ்டா கிரேஸ் மெக்நீல்: இவரது கழுத்தின் இடதுபுறத்தில் சிறகைக் குறிக்கும் பச்சை குத்தப்பட்ட தனித்துவமான அடையாளம் உள்ளது.

இவர்கள் கைது செய்யப்படுவதைத் தவிர்ப்பதற்காக தங்கள் தாடி, தலைமுடியின் நிறம், ஒப்பனை மற்றும் ஆடை அமைப்புகளை மாற்றியமைக்கக் கூடும் என புலனாய்வாளர்கள் சுட்டிக்காட்டியுள்ளனர்.

குற்றத்திற்குப் பயன்படுத்தப்பட்ட துப்பாக்கி இதுவரை கைப்பற்றப்படாததால், இவர்கள் இருவரும் ஆயுதமேந்திய ஆபத்தான நபர்களாகக் கருதப்படுகின்றனர்.

எனவே, பொதுமக்கள் எவரும் இவர்களை அணுக வேண்டாம் என்றும், கண்டறிந்தால் உடனடியாக 911 என்ற அவசர இலக்கத்திற்கு அழைக்குமாறும் பொலிஸார் கேட்டுக்கொண்டுள்ளனர்.

சம்பவம் தொடர்பாகப் பயன்படுத்தப்பட்டதாகச் சந்தேகிக்கப்பட்ட வெள்ளை நிற நிசான் வாகனம் மற்றும் கருப்பு நிற மாஸ்டா வாகனம் ஆகியவற்றை பொலிஸார் மீட்டுள்ளனர். சந்தேகநபர்கள் உடனடியாக வழக்கறிஞரைத் தொடர்புகொண்டு சரணடையுமாறு பொலிஸார் வலியுறுத்தியுள்ளனர்.