கனடாவின் இந்தப் பகுதியில் கால்நடை திருட்டு அதிகரிப்பு

 கனடாவின் மேனிடோபா பகுதியில கால்நடை திருட்டுச் சம்பவங்கள் வெகுவாக அதிகரித்துள்ளதாகத் தெரிவிக்கப்படுகின்றது.

டேரன் மேக்மில்லனுக்கு கால்நடைகளை வளர்ப்பது மிகவும் பிடித்தமான ஒன்றாகும். ஆனால், அப்பகுதியில் சமீபகாலமாக அதிகரித்து வரும் கால்நடை திருட்டுகள் காரணமாக, இந்தத் தொழிலை செய்வது ஆபத்து நிறைந்ததாக மாறியுள்ளது.

வின்னிபெக் நகருக்கு வடமேற்கே சுமார் 39 கிலோமீட்டர் தொலைவில் உள்ள வாரன் பகுதிக்கு அருகே அமைந்துள்ள தனது பண்ணையில், ஒவ்வொன்றும் பல்லாயிரக்கணக்கான டாலர்கள் மதிப்புள்ள கால்நடைகளை மேக்மில்லன் வளர்த்து வருகிறார்.

தனது மந்தையை தொடர்ந்து கண்காணித்து வந்தாலும், அவற்றைப் பாதுகாப்பது என்பது ஒரு தொடர் கவலையாகவே உள்ளது என்று அவர் கூறுகிறார்.

"நான் குழந்தையாக இருந்தபோது, திருடப்பட்டு வெட்டப்பட்ட விலங்குகளின் உடல்களைப் பார்த்தது நினைவிருக்கிறது. எனது அண்டை வீட்டாரின் டிரெய்லர் லோடு கணக்கிலான கால்நடைகள் திருடப்பட்டதை நான் அறிவேன். அவை எங்கு சென்றன என்று தெரியவில்லை.

காவல்துறை அவற்றை தேட முயன்று வருகிறது," என்று அவர் கூறினார். தனது பண்ணையில் இதுவரை எந்தத் திருட்டும் நடக்கவில்லை என்றாலும், அந்த பயம் எப்போதும் தனது மனதில் இருப்பதாக அவர் கூறுகிறார்.

மேனிடோபா அரசு அண்மையில் வெளியிட்ட செய்திக்குறிப்பின்படி, 2021 முதல் 2025 வரை கால்நடை திருட்டு அல்லது மோசடி தொடர்பாக 57 வழக்குகள் மேனிடோபா காவல்துறையில் பதிவாகியுள்ளன.

இத்தகைய சம்பவங்களைத் தொடர்ந்து, கால்நடை குற்றங்களைக் கடுமையாகக் கட்டுப்படுத்த மேனிடோபா மாநில அரசு நடவடிக்கை எடுத்துள்ளது.

கால்நடை தொடர்பான குற்றங்களை விசாரிக்க ஒரு தனி அதிகாரியை நியமிக்க மேனிடோபா காவல்துறைக்கு நிதி வழங்கி வருவதாக மாநில நீதித்துறை அமைச்சர் மேட் வீபே மற்றும் விவசாயத் துறை அமைச்சர் ரான் கோஸ்டிஷின் தெரிவித்தனர்.

"எங்கள் அரசு சட்ட அமலாக்கத்தை வலுப்படுத்தி, பண்ணையாளர்கள் மற்றும் காவல்துறையினருக்கிடையேயான ஒருங்கிணைப்பை மேம்படுத்துகிறது.

மேனிடோபாவின் விவசாயத் துறைக்கு எதிராகக் குற்றம் புரிபவர்கள் சட்டத்தின் முன் நிறுத்தப்படுவதை உறுதி செய்கிறது," என்று அமைச்சர் வீபே கூறினார்.