லங்காசிறி FM
ஒஸ்கார் விருது விழாவின் ஒளிபரப்பு உரிமத்தை பெற்றது யூடியூப்
ஆஸ்கார் விருது வழங்கும் நிகழ்ச்சிகளின் ஒளிபரப்பு உரிமத்தை யூடியூப் தளம் பெற்றுள்ளது,
திரைத்துறையின் உயரிய அங்கீகாரமாக பார்க்கப்படும் ஒஸ்கார் விருதுகள் உலகம் முழுவதிலும் இருந்து சிறந்த திரைப்படங்களை தேர்ந்தெடுக்கப்பட்டு அதற்கான அங்கீகாரத்தை வழங்குகிறது. வருடந்தோறும் அமெரிக்காவில் இந்த விழா பிரம்மாண்டமாக நடத்தப்படுகிறது.
அமெரிக்காவின் ABC தொலைக்காட்சி இந்த ஒஸ்கார் விழாவை ஒளிபரப்பி வருவதோடு 2028 வரை ஒஸ்கார் விழாவை ஒளிபரப்பும் உரிமையை ABC தொலைக்காட்சி நிறுவனம் தன்வசம் வைத்துள்ளது.
இந்நிலையில் 2029ஆம் ஆண்டு முதல் 2033 வரை ஒஸ்கார் விருதுகளின் உலகளாவிய ஒளிபரப்பு உரிமையை யூடியூப் தளம் பெற்றுள்ளது.
கூகுள் நிறுவனத்திற்குச் சொந்தமான யூடியூப் தளம் 200 கோடிக்கும் அதிகமான பார்வையாளர்களைக் கொண்டுள்ளது.
இந்த ஒப்பந்த காலத்தில் பிரபலங்களின் சிவப்பு கம்பள வரவேற்பு, விருதளிக்கும் நிகழ்வு என ஒஸ்கார் தொடர்பான அனைத்து நிகழ்வுகளும் யூடியூப்பில் மட்டுமே வெளியாகும். இதற்காக யூடியூப்பில் பிரத்தியேக டிஜிட்டல் தளம் ஒன்றும் உருவாக்கப்பட உள்ளது.
இதன்படி ஒஸ்கார் விருதுகள் விழா உலகெங்கிலும் இலவசமாக ஸ்ட்ரீமிங் செய்யப்படும் எனத் தெரிவிக்கப்படுகின்றது. இது ஒஸ்கார் விருதுகளுக்கு ஒரு புதிய பரிமாணத்தைத் தரும் என்றும் உலகெங்கிலும் உள்ள ரசிகர்களைச் சென்றடைய இது மிகப்பெரிய உதவியாக இருக்கும் என்று ஒஸ்கார் அகாடெமி தெரிவித்துள்ளது.
