ஆஸ்திரேலிய ஆழ்கடலில் அதிசயம்: இதுவரை கண்டிராத "நடக்கும்" மீன்

Report

ஆஸ்திரேலியாவில் கிரேட் பேரியர் ரீஃப் என்ற கடலடிப் பவளப்பாறை அமைந்த வடக்குக் கடல் பகுதியில், இதுவரை கண்டிராத "நடக்கும்" மீன் கண்டுபிடிக்கப்பட்டுள்ளதாக ஆய்வாளர்கள் கூறுகின்றனர்.

இந்த வகை மீன் பொதுவாக மத்திய பசிஃபிக் பகுதியில் காணப்படும்.

அத்துடன் , ரினோபியஸ் அக்ரிலோபா எனப்படும் தேள் மீன் வகையை சேர்ந்தது எனவும் ஆய்வாளர்கள் தெரிவிக்கின்றனர்.

வழக்கத்துக்கு மாறான இருப்பிடம் அல்லாத பிற கடல்பகுதியில் இந்த வகை மீன் காணப்படுவது இதுவே முதல்முறையாகும்.

அதன் மார்புப்பகுதியோடு ஒட்டி இருக்கும் துடுப்புகளால் கடலுக்கு அடியில் உள்ள தரையில் நடப்பது போல் காட்சியளிக்கும் என்பதால், இது "நடக்கும் மீன்" என அழைக்கப்படுகிறது.

ஸ்மிட் ஓஷன் நிறுவனத்தால் இயக்கப்பட்ட RV Falkor என்ற கப்பல் மூலமாகவே இது கண்டுபிடிக்கப்பட்டுள்ளது.

கிரேட் பேரியர் ரீஃப் பகுதியில் இதுவரை ஆய்வு செய்யடாத இடங்களை படம்பிடிக்கவும், மாதிரிகளை சேகரிக்கவும் கடலுக்கு அடியில் இரண்டு கிலோ மீட்டர் தூரத்திற்கு டிரோன் ஒன்று அனுப்பப்பட்டது.

இந்த ஆய்வுக்குழுவில், ஆஸ்திரேலியா, ஜப்பான் ஆகிவற்றின் ஆய்வாளர்கள் இடம்பெற்றிருந்தனர்.

இது தொடர்பில் ஆஸ்திரேலியாவின் ஜேம்ஸ் குக் பல்கலைக்கழகத்தின் ராபின் பீமேன் கூறுகையில்,

நடக்கும் மீனை அக்கடல் பகுதியில் கண்டுபிடித்தது தங்கள் குழுவிற்கு மிகுந்த வியப்பளித்ததாக தெரிவித்தார்.

அத்துடன் "பார்ப்பதற்கு அதிசயமாகவும், விசித்திரமாகவும் இருந்தது. அழகான சிவப்பு நிறத்தில் இருந்த அந்த மீன், தனது துடுப்புகளை கைகள் போல பயன்படுத்தி நடந்து சென்றது" என்று அவர் குறிப்பிட்டார்.

மேலும் வேறு சில புதிய வகையான கறுப்பு பவளப்பாறைகளும் இந்த ஆய்வில் கண்டுபிடிக்கப்பட்டன.

அதோடு , கிரேட் பேரியர் ரீஃப் கடல் பகுதியில் அடியில் சுமார் 40ல் இருந்து 50 மில்லியன் ஆண்டுகள் பழமையான பாறைகளின் மாதிரிகளும் கண்டெடுக்கப்பட்டுள்ளதாகவும் அவர்கள் கூறியுள்ளனர்.

மேலும் இந்த ஆய்வு, கடலுக்கு அடியில் வாழும் உயிரினங்கள் குறித்த ஆழமான புரிதலுக்கு உதவும் என ஆராய்ச்சியாளர்கள் நம்புகின்றனர்.

5269 total views