சர்வதேச ஊடகங்களின் தலைப்புச் செய்தியாக மாறிய இலங்கை ஜனாதிபதி தேர்தல்!

  சர்வதேச ஊடகங்களின் பிரதான தலைப்புச் செய்திகளாக இலங்கை ஜனாதிபதித் தேர்தல் மாறியுள்ளது. அந்தவகையில் BBC, REUTERS, CNN மற்றும் NDTV போன்ற ஊடங்கள் இலங்கை ஜனாதிபதித் தேர்தல் தொடர்பான செய்திகளுக்கு முக்கியத்துவம் கொடுத்து வருகின்றன.

இன்றையதினம் (21) இலங்கையின் ஒன்பதாவது ஜனாதிபதி தேர்தல் நாடாளாவிய ரீதியில் இடம்பெற்று வரும் நிலையில், அது தொடர்பில் சர்வதேச ஊடகங்கள் அதிக கவனம் செலுத்தியுள்ளன.

மக்கள் எதிர்ப்புகளால் ஜனாதிபதி பதவி நீக்கம் செய்யப்பட்ட பின்னர் இலங்கையில் நடைபெறும் முதல் தேர்தலில் வாக்களிப்பு

இலங்கையில் ராஜபக்க்ஷ குடும்ப ஆட்சியில் ஏற்பட்ட கடும் பொருளாதார நெருக்கடியால் இலங்கை மக்கள் மாபெரும் போராட்டங்களையும் ஆராப்பட்டங்களையும் முன்னெடுத்திருந்தனர்.

இந்நிலையில் கோட்டா கோ மக்களின் போராட்டத்தின் பின்னர் புதிய தலைவரை தெரிவு செய்யும் நோக்கில் தேர்தல் நடத்தப்படவுள்ளதாக வெளிநாட்டு ஊடகங்களில் குறிப்பிடப்பட்டுள்ளன.

BBC செய்தி சேவை அதன் தலைப்பில், “மக்கள் எதிர்ப்புகளால் ஜனாதிபதி பதவி நீக்கம் செய்யப்பட்ட பின்னர் இலங்கையில் நடைபெறும் முதல் தேர்தலில் வாக்களிப்பு” என குறிப்பிட்டுள்ளது.

போராட்டங்கள் மூலம் நிறைவேற்று அதிகாரம் கொண்ட ஜனாதிபதி பதவியில் இருந்து அகற்றப்பட்டதன் பின்னர் இலங்கை தனது முதலாவது ஜனாதிபதித் தேர்தலை நடத்தவுள்ளதாக அதில் குறிப்பிடப்பட்டுள்ளது.

2022 ஆம் ஆண்டில், நாட்டின் மிக மோசமான பொருளாதார நெருக்கடியால் மக்கள் எதிர்ப்புக்களில் ஜனாாதிபதி வெளியேற்றப்பட்ட பின்னர் முதல் தேர்தலில் புதிய ஜனாதிபதிக்கு வாக்களிக்க உள்ளனர்.

இலங்கையில் ஜனாதிபதித் தேர்தலை ஒரு பரந்த அரசியல் சூழ்நிலையாக, போராட்டத்திற்குப் பிறகு நாட்டை மீட்டெடுக்கும் நோக்கில் பொருளாதார சீர்திருத்தங்கள் மீதான வாக்கெடுப்பாக பிபிசி செய்திச் சேவை குறிப்பிட்டுள்ளது.

எனினும் நாட்டில் வரி அதிகரிப்பு, மானியங்கள் மற்றும் நலன்புரி குறைப்புக்களால் பலர் இன்னும் வாழ்க்கையை நடத்த முடியாமல் திணறி வருவதாக பிபிசி தெரிவித்துள்ளது.

அதேவேளை இலங்கை ஜனாதிபதி தேர்தல் தொடர்பில், REUTERS செய்திச் சேவை தனது தலைப்புச் செய்தியில், “நெருக்கடியால் பாதிக்கப்பட்டுள்ள இலங்கை பொருளாதார எதிர்காலத்தை தீர்மானிக்கும் முக்கியமான தேர்தலில் மக்கள் வாக்களிக்கின்றனர்” என குறிப்பிடப்பட்டுள்ளது.

மேலும் இலங்கையில் ஏற்பட்ட கடும் பொருளாதார நெருக்கடியின் பின்னர் பொருளாதார எதிர்காலத்தை தீர்மானிக்கும் வகையில் இலங்கையின் ஜனாதிபதித் தேர்தல் நடைபெறுவதாகவும் REUTERS செய்திச் சேவை குறிப்பிடப்பட்டுள்ளது.