அமெரிக்கா-கனடா எல்லையில் சர்வதேச ஆயுதக் கடத்தல் சதி

 அமெரிக்கா மற்றும் கனடா எல்லையோரப் பகுதியான நியூயார்க்கின் அக்வெசாஸ்னே மொஹாக் பகுதியைச் சேர்ந்த நான்கு நபர்கள், எல்லை தாண்டிய சர்வதேச சட்டவிரோத ஆயுதக் கடத்தல் சதித்திட்டத்தில் தங்களுக்குத் தொடர்பிருப்பதை அமெரிக்க நீதிமன்றத்தில் ஒப்புக்கொண்டுள்ளனர்.

குற்றம் சாட்டப்பட்ட கான்ராட் ஓக்ஸ், டைசன் டெரன்ஸ் , ரானோன்க்வாட்செரோன்ஹவி கிப்சன் மற்றும் மொன்டானா குக் ஆகிய நால்வரும் செப்டம்பர் 26 முதல் அக்டோபர் 9-க்கு இடைப்பட்ட நாட்களில் நீதிமன்றத்தில் தங்கள் குற்றங்களை ஒப்புக்கொண்டனர்.

அமெரிக்கப் புலனாய்வு அமைப்பான ஏடிஎஃப் மற்றும் ஹோம்லேண்ட் செக்யூரிட்டி இணைந்து நடத்திய தீவிர விசாரணையில், இந்த சர்வதேசக் கும்பல் அமெரிக்காவில் போலி வாடிக்கையாளர்களைப் பயன்படுத்தித் துப்பாக்கிகளை வாங்கி, அவற்றை அக்வெசாஸ்னே எல்லை வழியாகக் கனடாவிற்குள் கடத்தியது கண்டறியப்பட்டது.

அதேவேளை, கனடாவிலிருந்து போதைப்பொருட்களையும், மனிதர்களையும் அமெரிக்காவிற்குள் இவர்கள் சட்டவிரோதமாகக் கடத்தியுள்ளனர்.

நியூ ஹாம்ப்ஷயரில் வாங்கப்பட்ட சுமார் 51 சட்டவிரோதத் துப்பாக்கிகள் வெர்மான்ட் மற்றும் அக்வெசாஸ்னே வழியாகக் கனடாவிற்குள் கடத்தப்பட்டுள்ளன.

இதில் குறைந்தது 10 துப்பாக்கிகள் மொண்ட்ரியால் துப்பாக்கிச் சூடு உட்படக் கனடாவின் பல்வேறு குற்றச் சம்பவங்கள் நடந்த இடங்களிலிருந்து காவல்துறையினரால் கைப்பற்றப்பட்டுள்ளன.

அக்வெசாஸ்னே பிராந்தியத்தின் நியூயார்க் பகுதியிலிருந்து கார்ன்வால் தீவுக்குப் போலி வாடிக்கையாளர்கள் மூலம் வாங்கப்பட்ட துப்பாக்கிகள், ஜெட் ஸ்கை போன்ற படகுகள் மூலம் கடத்தப்பட்டு, பின்னர் அங்கிருந்து கடத்தல் சோதனச்சாவடிகள் வழியாகக் கனடாவிற்குள் விநியோகிக்கப்பட்டுள்ளன.

இந்த வழக்கில் ஏற்கெனவே ஜஸ்டின் ஜாக்சன், மெலிசா லாங், டஸ்டின் டட்டில், கேலப் வில்காட் மற்றும் டக் முல்லிகன் ஆகிய ஐந்து நபர்கள் தங்களது குற்றங்களை ஒப்புக்கொண்டுள்ளனர்.

போலி நபர்கள் மூலம் துப்பாக்கி வாங்கும் சதிக்கு அதிகபட்சமாக 25 ஆண்டுகள் சிறைத்தண்டனையும், ஆயுதக் கடத்தல் சதிக்கு 15 ஆண்டுகள் வரை சிறைத்தண்டனையும் கிடைக்க வாய்ப்புள்ளது.