தரவுகளைத் திருடிய ஹேக்கர்களுக்கு உதவிய கனேடிய நிபுணர் கைது!

அமெரிக்காவின் மத்தியப் புலனாய்வுத் துறையான எஃப்பிஐ மேற்கொண்டுவரும் சைபர் குற்றவாளிகளுக்கு எதிரான தொடர் நடவடிக்கையில், கனடாவைச் சேர்ந்த பிரபல ரேன்சம்வேர் தொடர்பாளர் எட்வர்ட் டூப்ரோவ்ஸ்கி கைது செய்யப்பட்டுள்ளார்.

அவர் மீது மிரட்டி பணம் பறித்தல் தொடர்பான குற்றச்சாட்டுகள் பதிவு செய்யப்பட்டுள்ளதாக நீதிமன்ற ஆவணங்கள் மற்றும் சிறைத்துறை பதிவுகள் தெரிவிக்கின்றன. பென்சில்வேனியா கிழக்கு மாவட்ட நீதிமன்றத்தில் தாக்கல் செய்யப்பட்டுள்ள ஆவணங்களின்படி, எட்வர்ட் டூப்ரோவ்ஸ்கி மீது கீழ்க்கண்ட குற்றச்சாட்டுகள் சுமத்தப்பட்டுள்ளன:

பணத்தைப் பறிக்கும் நோக்கத்துடன் தகவல்களின் ரகசியத்தன்மையை அச்சுறுத்தும் வகையிலான சதித் திட்டம்.

வர்த்தக நடவடிக்கைகளுக்கு இடையூறு விளைவித்தல்.

இந்த வழக்கு தொடர்பான நீதிமன்றப் பதிவுகள் சில பகுதிகள் முடக்கப்பட்ட நிலையில் உள்ளன. எனினும், சைபர் பாதுகாப்பு நிறுவனமான 'சைபர் ஸ்டீவர்ட்' நிறுவனத்துடன் தொடர்புடைய கனேடிய சைபர் பாதுகாப்பு நிபுணரான எட்வர்ட் டூப்ரோவ்ஸ்கியே இந்தக் கைது நடவடிக்கைக்கு ஆளாகியுள்ளதாகத் தெரியவந்துள்ளது.

இவரது நிறுவனமானது சைபர் குற்றவாளிகளுடன் பேச்சுவார்த்தை நடத்துவது மற்றும் சுமுகத் தீர்வு காண்பதில் சிறப்பு நிபுணத்துவம் பெற்றது எனக் கூறப்படுகிறது.

தற்போது 54 வயதான எட்வர்ட் டூப்ரோவ்ஸ்கி, டொராண்டோ நகருக்கு வடக்கே உள்ள ரிச்மண்ட் ஹில் பகுதியைச் சேர்ந்தவர் என்றும், அவர் பிலடெல்பியாவில் உள்ள மத்திய தடுத்து வைப்பு மையத்தில் அடைக்கப்பட்டுள்ளதாகவும் சிறைத்துறை பதிவுகள் உறுதிப்படுத்துகின்றன.

எஃப்பிஐ பணியாளர்கள் குறித்த ரகசியத் தகவல்களைத் திருடி பெரும் பரபரப்பை ஏற்படுத்திய 'ஷைனிஹண்டர்ஸ்' என்ற ஹேக்கர் குழுவை முடக்கும் பணியில் எஃப்பிஐ தீவிரம் காட்டி வருகிறது.

இந்தச் சூழலில்தான் இந்தைக் கைது நடவடிக்கை எடுக்கப்பட்டுள்ளது. ஷைனிஹண்டர்ஸ் குழுவிற்கு உடந்தையாகச் செயல்பட்ட சந்தேகத்தின் பெயரிலேயே இந்தக் கைது நடவடிக்கை எடுக்கப்பட்டுள்ளதாக எஃப்பிஐ இயக்குநர் காஷ் படேல் (Kash Patel) உறுதிப்படுத்தியுள்ளார்.

எனினும், இது குறித்து எஃப்பிஐ தரப்பில் கூடுதல் தகவல்கள் எதையும் வெளியிட மறுத்துவிட்டனர்.