பிரித்தானிய விசா நடைமுறையில் அதிரடி மாற்றம்

ஐக்கிய இராச்சியத்தின் (UK) குடிவரவுத் துறையில் மிகப்பெரிய மாற்றமாக, விசா ஸ்டிக்கர் (Vignette) வழங்கும் முறை முடிவுக்கு கொண்டுவரப்பட்டுள்ளது.

2026 பெப்ரவரி 25 முதல் விண்ணப்பிக்கும் அனைத்துப் பயணிகளுக்கும் இனி டிஜிட்டல் முறையிலான 'eVisa' மட்டுமே வழங்கப்படும் என அறிவிக்கப்பட்டுள்ளது.

அவுஸ்திரேலியாவின் டிஜிட்டல் விசா முறையைப் பின்பற்றி, பிரித்தானியாவும் முழுமையான டிஜிட்டல் குடிவரவு முறைக்கு மாறியுள்ளது.  

இதற்கு முன்னர் விசா அனுமதிக்கப்பட்டதும், உங்களது கடவுச்சீட்டில் விசா ஸ்டிக்கர் ஒட்டப்படும். இதற்காக விண்ணப்பதாரர்கள் தமது கடவுச்சீட்டை விசா விண்ணப்ப மையத்தில் (VAC) ஒப்படைக்க வேண்டியிருந்தது. புதிய மாற்றத்தின்படி இனி கடவுச்சீட்டில் எவ்வித ஸ்டிக்கர்களும் ஒட்டப்படமாட்டாது. 

உங்களது விசா அனுமதி, உங்களது கடவுச்சீட்டுடன் இணைக்கப்பட்ட மின்னணு (Digital) முறையில் UKVI இணையக் கணக்கில் சேமிக்கப்படும். பெப்ரவரி 25 முதல் புதிய விண்ணப்பதாரர்களுக்கு டிஜிட்டல் விசா மட்டுமே செல்லுபடியாகும்.

UKVI உத்தியோகபூர்வ அறிவிப்பின்படி, பயணிகள் பயணத்திற்கு முன்னர் பின்வரும் படிமுறைகளை மேற்கொள்ள வேண்டும். உங்களது மின்னஞ்சல் மற்றும் கடவுச்சீட்டு விபரங்களைப் பயன்படுத்தி உத்தியோகபூர்வ இணையதளத்தில் இலவசமாக ஒரு கணக்கை உருவாக்கவும்

உங்களது கணக்கிற்குள் நுழைந்து உங்களது விசா அனுமதி டிஜிட்டல் முறையில் உள்ளதா என உறுதிப்படுத்தவும். டிஜிட்டல் விசாவில் உள்ள கடவுச்சீட்டு இலக்கமும், நீங்கள் கையில் வைத்திருக்கும் கடவுச்சீட்டு இலக்கமும் சரியாக இருப்பதை உறுதி செய்யவும்.

பயணத்திற்கு குறைந்தது 24 மணிநேரத்திற்கு முன்னதாக உங்களது UKVI கணக்கில் விபரங்கள் சரியாக உள்ளனவா எனச் சரிபார்க்குமாறு அறிவுறுத்தப்பட்டுள்ளது. 

விசா பெற்ற பின்னர் நீங்கள் புதிய கடவுச்சீட்டு எடுத்தால், உடனடியாக அதை உங்களது UKVI கணக்கில் புதுப்பிக்க வேண்டும். இல்லையெனில் விமான நிறுவனங்கள் உங்களை அனுமதிக்காது.

உங்களது விசா அந்தஸ்தை நிரூபிக்க 'Share Code' எனும் குறியீட்டைப் பயன்படுத்தலாம். இனிமேல் விசா விண்ணப்ப மையங்களில் (VAC) உங்களது கடவுச்சீட்டை ஒப்படைக்கத் தேவையில்லை. ஒருமுறை நேர்முகத் தேர்விற்குச் சென்றுவிட்டு, கடவுச்சீட்டை நீங்களே கையில் வைத்திருக்கலாம்.  

பெப்ரவரி 25-க்கு முன்னர் விசா ஸ்டிக்கர் பெற்றவர்களின் விசாக்கள் காலாவதியாகும் வரை செல்லுபடியாகும். இருப்பினும், அவர்களும் ஒரு UKVI கணக்கை உருவாக்கித் தமது விபரங்களை டிஜிட்டல் மயப்படுத்துமாறு உள்துறை அமைச்சு (Home Office) பரிந்துரைத்துள்ளது.