கனடாவின் இராணுவத் தளத்தில் வெடிப்பு மற்றும் தீ விபத்து: பலர் உயிரிழப்பு!

கனடாவின் எட்மண்டனுக்குக் கிழக்கே அமைந்துள்ள கனடியப் படைகளின் வெயின்ரைட் தளத்தில் ஏற்பட்ட வெடிப்பு மற்றும் தீ விபத்து காரணமாக பல உயிரிழப்புகளும் காயங்களும் ஏற்பட்டுள்ளதாகக் பெடரல் பாதுகாப்புத் துறை அமைச்சர் டேவிட் மெக்குயின்டி தெரிவித்துள்ளார்.

தளத்தில் ஏற்பட்ட இந்தச் சம்பவத்தின் காரணமாக உயிரிழப்புகளும் காயங்களும் ஏற்பட்டுள்ளன என்பதை மிகுந்த வருத்தத்துடன் தெரிவித்துக் கொள்வதாக அமைச்சர் குறிப்பிட்டுள்ளார்.

சம்பவம் குறித்த சூழ்நிலை இன்னும் மிகவும் "செயலில் உள்ள மற்றும் மென்மையானதொரு நிலையில்" உள்ளதாகக் குறிப்பிட்ட அவர், உயிரிழப்புகளின் சரியான எண்ணிக்கையை உடனடியாக உறுதிப்படுத்த மறுத்துவிட்டார்.

கனடிய ஆயுதப் படைகள், தேசிய பாதுகாப்புத் துறை மற்றும் பிற மத்திய முகாம்கள் ஆகியவை மாகாண மற்றும் நகராட்சி அரசாங்களுடன் இணைந்து, "தேவையான அனைத்து உதவிகளையும் திரட்டுவதற்கும், உண்மையில் என்ன நடந்தது என்பதன் விவரங்களை ஆராய்வதற்கும்" தீவிரமாக உழைத்து வருவதாக அவர் கூறினார்.

"வரும் மணிநேரங்களிலும் நாட்களிலும் இது குறித்துக் கூடுதல் தகவல்களை வெளியிடுவோம். இந்தத் துயரச் சம்பவத்தால் பாதிக்கப்பட்ட அனைவருடனும், அவர்களது குடும்பத்தினருடனும் எங்கள் எண்ணங்கள் உள்ளன.

குறிப்பாக, இக்கட்டான இச்சூழலில் உதவி வழங்கும் அவசரகால மீட்புக் குழுவினருக்கும் மற்றும் அனைவருக்கும் எனது நன்றியைத் தெரிவித்துக் கொள்கிறேன்" என்று மெக்குயின்டி மேலும் குறிப்பிட்டார்.

சம்பவம் குறித்துப் பல விவரங்கள் இன்னும் அறியப்படவில்லை எனக் குறிப்பிட்ட அவர், "அண்மைக் காலத்தில் இதுபோன்றதொரு சம்பவத்தை நான் பார்த்ததில்லை" என்றும் தெரிவித்தார். பலத்த காற்று காரணமாகச் சனிக்கிழமை மாலை இப்பகுதியில் தீ விபத்து மிக வேகமாகப் பரவியதாக வெயின்ரைட் நகராட்சி மாவட்டம் தெரிவித்துள்ளது.

மாவட்டத்தின் சமூக ஊடகப் பதிவு ஒன்றின்படி, "மக்கள், சொத்துக்கள் மற்றும் முக்கிய உள்கட்டமைகளைக் காப்பாற்றுவதற்காக" அவசரகால மீட்புக் குழுவினர் தீவிரமாகச் செயற்பட்டு வந்தனர். சனிக்கிழமை மாலை 7:30 மணி நிலவரப்படி, வசிப்பவர்களுக்கான எந்தவொரு வெளியேற்ற உத்தரவும் பிறப்பிக்கப்படவில்லை.

வெயின்ரைட் சமூகத்தினருக்கு தீயினால் ஏதேனும் ஆபத்து உள்ளதா என்று கேட்டதற்கு, மருத்துவமனை ஆதரவு மற்றும் தீயணைப்புப் பணிகளில் அப்பகுதி மக்கள் உதவி செய்து வருவதாக அமைச்சர் மெக்குயின்டி தெரிவித்தார். தீ விபத்து குறித்துக் கருத்துத் தெரிவித்த அமைச்சர், "இது மிக நெருக்கமாகக் கண்காணிக்கப்பட்டு வருகிறது.

இது குறித்து உரிய நேரத்தில் மேலதிக விவரங்கள் வெளியிடப்படும்" என்றார். தளத்தின் வேலியைக் கடந்து சென்ற இந்தத் தீ, வெயின்ரைட்டுக்குத் தெற்கே கட்டுப்படுத்தப்பட்டு வருவதாக அதிகாரிகள் தெரிவித்தனர்.

இருப்பினும், டவுன்ஷிப் சாலை 44-0 இற்குக் தெற்கே ஒரு தீவிரமான தீ எரிந்துகொண்டே இருந்தது. சனிக்கிழமையன்று இப்பகுதியின் சில இடங்களில் மணிக்கு 100 கி.மீ வேகத்தில் காற்று வீசியதால், தீயணைப்பு வீரர்கள் மிகவும் சவாலான சூழலில் போராடினர்.

சஸ்காட்சுவான் மற்றும் பிரிட்டிஷ் கொலம்பியா ஆகிய பிற மாகாணங்களின் தலைவர்களும் ஆல்பர்ட்டா மாகாணத்திற்குத் தேவையான அனைத்து அவசரகால உதவிகளையும் வழங்கத் தயாராக இருப்பதாகத் தெரிவித்துள்ளனர்.