அமெரிக்காவின் பொருளாதார முற்றுகை குறித்து ஈரான் கடும் எச்சரிக்கை
ஈரான் மீது அமெரிக்கா விதித்துள்ள கடல்வழி வர்த்தக மற்றும் பொருளாதார முற்றுகையை ஒரு 'போர் நடவடிக்கையாக' கருதுவதாகவும், அதனை உடைத்தெறியத் தேவையான எந்தவொரு நடவடிக்கையையும் எடுக்கத் தயங்கமாட்டோம் எனவும் ஈரானின் துணை வெளியுறவு அமைச்சர் காசெம் கரிபாபாதி அமெரிக்காவிற்குக் கடும் எச்சரிக்கை விடுத்துள்ளார்.
ஈரானிய ஊடகங்களுக்கு இன்று பேட்டியளித்த அவர், அமெரிக்காவின் பொருளாதாரத் தடைகள் மற்றும் அணுசக்திப் பேச்சுவார்த்தைகள் குறித்த ஈரானின் உறுதியான நிலைப்பாட்டைத் தெளிவுபடுத்தினார்.
"அமெரிக்காவின் இந்தப் பொருளாதார முற்றுகையை நாங்கள் ஒரு விரோதப் போக்காகவும், போர் நடவடிக்கையாகவுமே கருதுகிறோம். இந்த முற்றுகையை உடைப்பதற்குத் தேவையான அனைத்து நடவடிக்கைகளையும் ஈரான் மேற்கொள்ளும்" எனத் திட்டவட்டமாகத் தெரிவித்தார்.

மேலும், இது குறித்த ஈரானின் கடுமையான நிலைப்பாடு மத்தியஸ்த நாடுகள் மூலமாக வாஷிங்டனுக்கு ஏற்கனவே தெரியப்படுத்தப்பட்டுள்ளதாகவும் அவர் குறிப்பிட்டார்.
அணுசக்தித் திட்டம் தொடர்பான பேச்சுவார்த்தைகள் குறித்துப் பேசிய அவர், அமெரிக்காவுடனான அணுசக்திப் பேச்சுவார்த்தைகள் இன்னும் தொடங்கவில்லை என்பதை உறுதிப்படுத்தினார். ஒருபுறம் போர் மேகங்களும் பொருளாதார அழுத்தங்களும் அதிகரித்து வரும் சூழலில், இராஜதந்திரத் தீர்வுகளுக்கான கதவுகளை ஈரான் இன்னும் மூடவில்லை என்பதையும் கரிபாபாதி சுட்டிக்காட்டினார்.
இராஜதந்திரத்திற்கு மற்றொரு வாய்ப்பை உருவாக்க முடியுமா என்பதை ஆராய்வதற்காக, கத்தார் உள்ளிட்ட மத்தியஸ்த நாடுகளுடன் நேரடியாகவும் மெய்நிகர் மூலமாகவும் ஈரான் தொடர்ந்து பேச்சுவார்த்தை நடத்தி வருகிறது என குறிப்பிட்டார்.