ரொறன்ரோ பல்கலைக்கழக வளாக விடுதியில் 19 வயது இளைஞர் உயிரிழப்பு

ரொறன்ரோ பல்கலைக்கழகத்தின் மிசிசாகா வளாக மாணவர் விடுதியில் 19 வயது இளைஞர் ஒருவர் துப்பாக்கியால் சுட்டுக்கொண்ட நிலையில் உயிரிழந்ததை அடுத்து, மாநிலக் காவல் துறை கண்காணிப்புக் குழுவான 'சிறப்பு புலனாய்வுப் பிரிவு' தனது முதற்கட்ட விசாரணையைத் தொடங்கியுள்ளது.

திங்கள்கிழமை பிற்பகலில் பிரம்டன் பகுதியில் இளைஞர் ஒருவர் பெண் ஒருவரைத் தாக்கியதாகக் காவல்துறைக்கு அவசர அழைப்பு (911) வந்தது.

அவரைத் தேடி கைது செய்ய முயன்ற பீல் பிராந்தியக் காவல்துறையினர், இரவு 9 மணியளவில் டுன்டாஸ் வீதி மற்றும் மிசிசாகா பகுதிக்கு அருகே உள்ள பல்கலைக்கழக மாணவர் விடுதியில் அவரை அடையாளம் கண்டனர்.

இதனையடுத்து, Residence வீதியில் அமைந்துள்ள மெக்லான் கோர்ட் விடுதிப் பகுதியில் காவல்துறையின் நடவடிக்கை தீவிரமடைந்ததை அடுத்து, பல்கலைக்கழக நிர்வாகம் திங்கள் இரவு சுமார் 9:30 மணியளவில் வளாகத்திற்குள் இருந்தவர்களைப் பாதுகாப்பான இடங்களில் இருக்குமாறு அவசர எச்சரிக்கை விடுத்தது.

காவல்துறையினர் சம்பவ இடத்தில் இருந்தபோது விடுதியின் உள்ளிருந்து துப்பாக்கிச் சூடு சத்தம் கேட்டுள்ளது. உள்ளே சென்று பார்த்தபோது, அந்த இளைஞர் தன்னைத்தானே துப்பாக்கியால் சுட்டுக் காயமடைந்த நிலையில் காணப்பட்டார். அவர் செவ்வாய்க்கிழமை அதிகாலை உயிரிழந்ததாக அதிகாரப்பூர்வமாக அறிவிக்கப்பட்டது.

சம்பவம் நடந்த இடத்தில் காவல்துறையினர் இருந்ததால், விதிமுறைகளின்படி இச்சம்பவம் குறித்து SIU-வுக்குத் தெரிவிக்கப்பட்டு, அவர்கள் விசாரணையைப் பொறுப்பேற்றுள்ளனர்.

இந்தச் சம்பவத்தில் வேறு எவருக்கும் காயங்கள் ஏற்படவில்லை என்றும், பொதுமக்கள் பாதுகாப்புக்கு எந்தவித அச்சுறுத்தலும் இல்லை என்றும் SIU உறுதிப்படுத்தியுள்ளது. இச்சம்பவம் குறித்து விரிவாக விசாரிக்க நான்கு புலனாய்வாளர்களும், இரண்டு தடையியல் நிபுணர்களும் நியமிக்கப்பட்டுள்ளனர்.

செவ்வாய்க்கிழமை வளாகம் திறக்கப்பட்டிருக்கும் என்ற போதிலும் வகுப்புகள் அனைத்தும் ரத்து செய்யப்பட்டுள்ளதாகப் பல்கலைக்கழக நிர்வாகம் சமூக வலைதளத்தில் அறிவித்துள்ளது. பாதிக்கப்பட்ட மாணவர்களுக்கும் பணியாளர்களுக்கும் மனநல ஆலோசனை மற்றும் உதவிகள் வழங்கப்படும் என தெரிவிக்கப்பட்டுள்ளது.

"வரும் நாட்களில் எங்களது சமூகத்திலிருந்து பல கேள்விகள் எழக்கூடும் என்பதை UTM உணர்கிறது. உங்களுக்கு ஆதரவாக நாங்கள் இருக்கிறோம் என்பதைத் தெரிவித்துக் கொள்கிறோம். பீல் பிராந்தியக் காவல்துறையிடமிருந்து வரும் தகவல்களுக்கு ஏற்ப மேலதிக செய்திகளைத் தொடர்ந்து பகிர்வோம்" என்று பல்கலைக்கழகம் தனது அறிக்கையில் குறிப்பிட்டுள்ளது.