நியூயார்க்கை 'நியூயார்க் மாகாணம்' என அழைப்போம் — டொரண்டோ மேயர் வேட்பாளர் சவால்!

கனடாவுடனான வர்த்தகப் போரின் பின்னணியில் 'ஒன்டாரியோ ஏரி'யின் பெயரை 'லேக் அமெரிக்கா' என மாற்றப்போவதாக அமெரிக்க ஜனாதிபதி டொனால்ட் டிரம்ப் எச்சரித்ததற்குப் பதிலடியாக, டொரண்டோ மேயர் வேட்பாளர் பிராட் பிராட்ஃபோர்ட் அமெரிக்காவின் நியூயார்க் மாநிலத்தை "நியூயார்க் மாகாணம்" என அழைக்க வேண்டும் என நகைச்சுவையாகப் பதிலடி கொடுத்துள்ளார்.

சமூக வலைத்தளத்தில் வீடியோ ஒன்றை வெளியிட்ட பிராட்ஃபோர்ட், ஒன்டாரியோ ஏரிக்கரையில் அமர்ந்தவாறு, "டிரம்ப் எங்களது ஏரியின் பெயரை மாற்ற விரும்பினால், நாங்களும் அவரது சொந்த மாநிலத்திற்குப் புதிய பெயர் வைப்போம்; அது வரலாற்று ரீதியாகவும் துல்லியமானது" எனக் குறிப்பிட்டார்.

1664 முதல் 1776 வரை நியூயார்க் பகுதி பிரிட்டிஷ் காலனியாக இருந்தபோது 'நியூயார்க் மாகாணம்' என்றே அழைக்கப்பட்ட வரலாற்றை அவர் சுட்டிக்காட்டினார்.

[58HPGE ]

எதிர்வரும் அக்டோபர் 26 அன்று நடைபெறவுள்ள நகராட்சித் தேர்தலில் தாம் மேயராகத் தேர்ந்தெடுக்கப்பட்டால், நியூயார்க்கை அதன் பழமையான வரலாற்றைப் போற்றும் வகையில் "நியூயார்க் மாகாணம்" என்றே அழைப்பேன் என்றும், அதற்கான நினைவுப் பலகை ஒன்றை டிரம்ப் டவரில் உள்ள டிரம்பிற்கு அனுப்பி வைக்கத் தயார் என்றும் அவர் கூறினார்.

இரு நாடுகளுக்கும் பொதுவான ஏரியின் பெயரை மாற்றுவதாக அச்சுறுத்துவது டொரண்டோ மக்களின் தேசபக்தியைக் குறைக்காது என்று கூறிய பிராட்ஃபோர்ட், அமெரிக்காவின் புதிய வரிகளுக்குப் பதிலடி கொடுக்கும் வகையில் அனைவரும் கனடியப் பொருட்களை மட்டுமே வாங்க வேண்டும் என வேண்டுகோள் விடுத்தார்.

வாஷிங்டன் செய்வதை நம்மால் மாற்ற முடியாது, ஆனால் டொரண்டோ தனக்கான ஆதரவை எப்படி வெளிப்படுத்துகிறது என்பதை நம்மால் தீர்மானிக்க முடியும் என்றார்.

அதேவேளையில், மேயர் தேர்தலில் போட்டியிடும் மற்றொரு வேட்பாளரான கிறிஸ் அலெக்ஸாண்டர், பிராட்ஃபோர்டின் இந்த கருத்தைக் கண்டித்துள்ளார்.

அமெரிக்காவுடன் வரலாறு காணாத வர்த்தகப் போர் நிலவும் இக்கட்டான சூழலில், ஒரு வேட்பாளர் அமெரிக்க அதிபருடன் பெயர் விளையாட்டு விளையாடிக் கொண்டிருக்கிறார்.

வர்த்தகப் போர் என்பது வேலைவாய்ப்புகள் மற்றும் முதலீடுகளுக்கு ஏற்பட்டுள்ள பெரும் அச்சுறுத்தல்; இது சுய விளம்பரம் செய்வதற்கான நேரமல்ல" என்று அவர் சாடியுள்ளார்.