உலகின் 3-வது அதிக பொது விடுமுறைகளைக் கொண்ட நாடாக இலங்கை

உலகிலேயே அதிக பொது விடுமுறை நாட்களைக் கொண்ட நாடுகளின் பட்டியலில் இலங்கை 3-வது இடத்தைப் பிடித்துள்ளது.

அமெரிக்காவின் 'பியூ ஆராய்ச்சி மையம்' (Pew Research Center) வெளியிட்டுள்ள புதிய பகுப்பாய்வு அறிக்கையின்படி இந்த தகவல் வெளியிடப்பட்டுள்ளது.

மியான்மர் முதலிடத்தையும், பங்களாதேஷ் இரண்டாம் இடத்தையும் வகிக்கின்றன.

ஐக்கிய நாடுகள் சபையில் உள்ள 190 உறுப்பு நாடுகளில் நடத்தப்பட்ட இந்த ஆய்வில், உலகளாவிய சராசரி விடுமுறை நாட்களின் எண்ணிக்கை 13 ஆகும். ஆனால், 2026-ஆம் ஆண்டில் இலங்கையில் 25 நாட்கள் பொது விடுமுறையாக அறிவிக்கப்பட்டுள்ளன.

• மியான்மர்: 30 நாட்கள் (முதலிடம்)

• பங்களாதேஷ்: 29 நாட்கள் (இரண்டாமிடம்)

• இலங்கை: 25 நாட்கள் (மூன்றாமிடம்)

கம்போடியா, ஈரான் மற்றும் லெபனான் ஆகிய நாடுகளும் 20-க்கும் மேற்பட்ட விடுமுறை நாட்களைக் கொண்டுள்ளன.

சுவிட்சர்லாந்தில் 1 தேசிய விடுமுறை மட்டுமே உள்ளது (மாநில அளவில் குறைந்தது 8 விடுமுறைகள் உண்டு). போஸ்னியா மற்றும் ஹெர்ஸகோவினாவில் 4 நாட்களும், உருகுவேயில் 5 நாட்களும் மட்டுமே பொது விடுமுறைகளாக உள்ளன.

இலங்கையில் பெரும்பாலான மக்கள் பௌத்த மதத்தைப் பின்பற்றுவதால், சந்திர சுழற்சியின் அடிப்படையில் ஒவ்வொரு பௌர்ணமி தினத்தையும்  அரசு பொது விடுமுறையாக அறிவிப்பதே இந்த அதிக எண்ணிக்கைக்கு முதன்மை காரணமாகும்.

பிற பௌத்த நாடுகள் விசாகப் பண்டிகைக்கு மட்டும் விடுமுறை அளிக்கும் வேளையில், இலங்கை ஒவ்வொரு பௌர்ணமிக்கும் விடுமுறை அளிக்கும் தனித்துவத்தைக் கொண்டுள்ளது.

அத்துடன், உலகளவில் கொண்டாடப்படும் கிறிஸ்துமஸ், பெரிய வெள்ளி, ரம்ஸான் (ஈத் அல்-ஃபித்ர்), பக்ரீத் (ஈத் அல்-அதா), தீபாவளி மற்றும் விசாகப் பண்டிகை போன்ற பல்வேறு மதப் பண்டிகைகளும் இலங்கையில் பொது விடுமுறைகளாகப் பின்பற்றப்படுகின்றன.

இலங்கையின் 1971-ஆம் ஆண்டின் 29-ஆம் இலக்க விடுமுறைச் சட்டத்தின் கீழ், அரச நிர்வாக, மாகாண சபைகள் மற்றும் உள்ளூராட்சி அமைச்சினால் 2027-ஆம் ஆண்டிற்கான விடுமுறைப் பட்டியல் வர்த்தமானியில் வெளியிடப்பட்டுள்ளது.

2027-ஆம் ஆண்டிலும் மொத்தம் 25 பொது மற்றும் வங்கி விடுமுறைகள் அறிவிக்கப்பட்டுள்ளன.

அவற்றில் 9 விடுமுறை நாட்கள் வெள்ளி அல்லது திங்கட்கிழமைகளில் வருவதால், மக்களுக்கு 9 நீண்ட வாரயிறுதி வாய்ப்புகள் கிடைக்கின்றன.

ஜனவரி மாதத்தில் ஜனவரி 15 மற்றும் 22 ஆகிய திகதிகளில் இருமுறை நீண்ட வாரயிறுதி அமைகிறது. மார்ச், மே, ஜூன், ஆகஸ்ட், அக்டோபர் மற்றும் டிசம்பர் மாதங்களிலும் இவ்வாய்ப்பு உள்ளது.

மே மாதத்தில் ஹஜ் பண்டிகை திங்கட்கிழமையிலும், வெசாகப் பண்டிகை புதன் மற்றும் வியாழக்கிழமைகளிலும் வருவதால், அந்த வாரத்தில் 2 நாட்கள் மட்டுமே வேலை நாட்களாக இருக்கும்.

எனினும், மே தினம் மற்றும் கிறிஸ்துமஸ் உட்பட 6 விடுமுறைகள் சனி அல்லது ஞாயிற்றுக்கிழமைகளில் வருவது குறிப்பிடத்தக்கது.