ரஷ்யாவின் கட்டுப்பாட்டுக்குள் உக்ரைன் நிலப்பரப்பு: வேதனையில் ஜெலன்ஸ்கி

உக்ரைன் நிலப்பரப்பில் ஐந்தில் ஒரு பகுதியை ரஷ்யா தனது கட்டுப்பாட்டில் வைத்திருப்பதாக உக்ரைன் அதிபர் வோலோடிமிர் ஜெலன்ஸ்கி (Volodymyr Zelensky) தெரிவித்துள்ளார்.

உக்ரைன் மீதான ரஷ்யாவின் போர் 100 நாட்களை கடந்துள்ளது. ரஷ்யாவை ஒட்டியிருக்கும் கிழக்கு உக்ரைன் பகுதிகளில் போர் தீவிரமடைந்துள்ளது.

இந்த நிலையில், ஐரோப்பிய நாடான லக்சம்பர்க்கில் நடைபெற்ற சட்ட உறுப்பினர்கள் மற்றும் பொதுமக்கள் கூட்டத்தில் காணொலி வாயிலாக கலந்துகொண்டு உக்ரைன் அதிபர் ஜெலென்ஸ்கி பேசினார்.

அவர் கூறியதாவது,

உக்ரைனின் 20 சதவீத நிலபரப்பை ரஷ்யாவின் கட்டுப்பாட்டுக்குள் வந்துள்ளது.

அதாவது, உக்ரைனின் கிரிமியன் தீபகற்பம் மற்றும் ரஷ்ய ஆதரவு பிரிவினைவாதிகளின் கட்டுப்பாட்டில் உள்ள பகுதிகள் உள்பட எங்கள் நாட்டின் ஐந்தில் ஒரு பகுதியை ரஷ்யா தனது கட்டுப்பாட்டில் வைத்திருக்கிறது.

மேலும், உக்ரைனின் கிழக்கு டான்பாஸ் பகுதியில் ரஷ்ய துருப்புகள் தங்கள் பிடியை இறுக்கி வருகின்றன. அவர்கள் தலைநகரைச் சுற்றியுள்ள பகுதிகளிலிருந்தும், வடகிழக்கு பகுதிகளிலிருந்தும் பின்வாங்கியுள்ளனர்.

அதேவேளையில், உக்ரைனின் கிழக்கு தொழில்துறை பகுதிகளில் தங்கள் தாக்குதலில் கவனம் செலுத்தியுள்ளனர்.

2014 இல், ரஷ்ய ஆதரவு பிரிவினைவாதிகள் மற்றும் ரஷ்ய இராணுவம் மொத்தம் 43,000 சதுர கி.மீ. பரப்பளவு பகுதியை ஆக்கிரமித்திருந்தன.

ஆனால், கடந்த 3 மாத கால போருக்கு பின், கிட்டத்தட்ட 1,25,000 சதுர கிலோ மீட்டராக ரஷ்யாவின் ஆக்கிரமிப்பு விரிவுபடுத்தப்பட்டுள்ளது.

மேலும், இப்போது நடைபெற்று வரும் போரால், மேலே குறிப்பிட்டதை விட இரண்டு மடங்கு அதிகமான பரப்பளவு, அதாவது கிட்டத்தட்ட 3,00,000 சதுர கி.மீ. பகுதிகளில் கண்ணிவெடிகள் மற்றும் வெடிக்காத வெடிகுண்டுகள் நிரம்பியுள்ளன, புதைக்கப்பட்டுள்ளன, அந்த பகுதிகள் மாசுபடுத்தப்பட்டுள்ளன.

உக்ரைன் மீதான ரஷ்யாவின் ராணுவ நடவடிக்கையால், 1 கோடியே 20 லட்சம் உக்ரேனியர்கள் இடம்பெயர்ந்துள்ளனர் மற்றும் 50 லட்சத்துக்கும் அதிகமானவர்கள் வெளிநாடுகளுக்குச் சென்றுள்ளனர். இவ்வாறு அவர் தெரிவித்துள்ளார்.