இக்கட்டான நேரத்தில் இந்தியாவுக்கு சிறப்பு தூதரை அனுப்பும் அமெரிக்க அதிபர் ஜோ பிடென்

அமெரிக்காவின் உயர்மட்ட இராஜதந்திரி டேனியல் ஸ்மித்தை (Daniel Smith) இந்தியாவுக்கு இடைக்கால தூதராக அமெரிக்க அதிபர் ஜோ பிடென்(Joe Biden), அனுப்புகிறார்.

இந்தியா எதிர்கொள்ளும் கொரோனா நெருக்கடிக்கு மத்தியில், இந்தியாவுக்கு தடுப்பூசிக்கான மூலப்பொருள் வழங்குவதில் அமெரிக்கா நடந்து கொண்ட விதத்தால் இந்தியா கடும் அதிருப்தி அடைந்துள்ளதாகக் கூறப்படும் நிலையில் இந்த நியமனம் முக்கியத்துவம் வாய்ந்ததாக பார்க்கப்படுகிறது.

இது தொடர்பில் அமெரிக்க வெள்ளை மாளிகை தரப்பில் தெரிவிக்கையில்,

இந்தியாவுடன் நெருக்கமான ஒத்துழைப்பை முன்னெடுப்பதற்கும், இரு நாடுகளும் தங்களது பகிரப்பட்ட முன்னுரிமைகளை தொடர்ந்து முன்னேற்றுவதை உறுதி செய்வதற்கும், கொரோனா தொற்றுநோயை சமாளிப்பதற்கு உதவுவதற்கும், ஜோ பிடென்(Joe Biden), தனது உயர்மட்ட நம்பகமான ராஜதந்திரியை இடைக்கால சிறப்பு தூதராக இந்தியா அனுப்புவதாக, குறிப்பிட்டுள்ளது.

இதேவேளை, அண்மையில் அமெரிக்கா வெளியுறவுத்துறை பொறுப்பு செயலாளராகவும், வெளியுறவுத் துறை துணை பொறுப்பு செயலாளராகவும் பணியாற்றிய வெளியுறவு சேவை நிறுவனத்தின் இயக்குனர் தூதர் டேனியல் ஸ்மித்,(Daniel Smith) இடைக்கால சிறப்பு தூதராக பணியாற்ற இந்தியாவிற்கு புறப்படுவார்” என்று அமெரிக்க வெளியுறவுத்துறை அறிவித்துள்ளது.

அமெரிக்காவின் 46’வது ஜனாதிபதியாக பிடென் பதவியேற்ற பின்னர் ஜனவரி 20 முதல் இந்தியாவுக்கான அமெரிக்க தூதர் பதவி காலியாக உள்ளது. இந்த பதவிக்கு செனட் உறுதிப்படுத்தல் தேவை. நியமனத்திற்குப் பிறகு உறுதிப்படுத்தும் செயல்முறை பொதுவாக பல மாதங்கள் ஆகும். இந்தியாவில் உள்ள நெருக்கடியைக் கருத்தில் கொண்டு, பிடென் நிர்வாகம் தூதர் இல்லாமல் தனது தூதரக செயல்பாடுகளை இந்தியாவில் மேற்கொள்வது மிகவும் சிரமம் ஆகும்.

இந்த நிலையில் ஸ்மித் (Daniel Smith) மிக உயர்ந்த வெளிநாட்டு சேவை தரத்தை கொண்ட தூதராக செயல்படுவார் என அமெரிக்காவின் ஜோ பிடென் (Joe Biden)நிர்வாகம் நம்புகிறது. “ஸ்மித்தின் நியமனம் இந்திய அரசு மற்றும் இந்திய மக்களுடனான எங்கள் கூட்டாண்மைக்கு அமெரிக்காவின் வலுவான உறுதிப்பாட்டை அடிக்கோடிட்டுக் காட்டுகிறது” என்று அமெரிக்க வெளியுறவுத்துறை செய்தித் தொடர்பாளர் நெட் பிரைஸ் (Net Price) கூறினார்.

“உலகளாவிய தொற்றுநோயைக் கடந்து செல்வது உட்பட, நம்முடைய பகிரப்பட்ட முன்னுரிமைகளை நம் நாடுகள் தொடர்ந்து முன்னெடுத்துச் செல்வதை உறுதி செய்வதற்காக அவர் இந்தியாவுடன் நெருக்கமான ஒத்துழைப்பை முன்னெடுப்பார்” என்றும்  பிரைஸ்  (Net Price) நம்பிக்கை வெளியிட்டுள்ளார்.