டெராண்டோவில் விண்ணைத் தொடும் உலகக் கிண்ண டிக்கட் விலை

2026 உலகக் கோப்பை கால்பந்து தொடரில், வியாழக்கிழமை டொராண்டோவில் நடைபெறவுள்ள போர்ச்சுகல் மற்றும் குரோஷியா அணிகளுக்கு இடையிலான 'சுற்று 32' (Round of 32) ஆட்டத்தைக் காண்பதற்கு, ரசிகர்கள் தங்களது வாழ்நாள் சேமிப்பையே செலவிட வேண்டிய நிலை ஏற்பட்டுள்ளது.

வரலாற்று முக்கியத்துவம் வாய்ந்த இப்போட்டிக்கான டிக்கெட் விலைகள், மறுவிற்பனை இணையதளங்களில் விண்ணைத் தொட்டுள்ளன.

'SeatGeek' போன்ற டிக்கெட் மறுவிற்பனை இணையதளங்களில், திங்கட்கிழமை நிலவரப்படி சில டிக்கெட்டுகளின் விலை 30,000 அமெரிக்க டாலர்களுக்கும் அதிகமாக விற்பனை செய்யப்பட்டு வருகிறது.

'Stubhub' மற்றும் 'SeatGeek' ஆகிய தளங்களில் மிகக் குறைந்த விலை கொண்ட ஒரு சாதாரண டிக்கெட்டே 2,600 டாலர்களுக்கும் அதிகமாக விற்கப்படுகிறது.

கடந்த டிசம்பர் மாதம் ஃபிஃபா (FIFA) அதிகாரப்பூர்வமாக டிக்கெட்டுகளை விற்பனை செய்தபோது, அதன் அசல் விலை 335 டாலர் முதல் 875 டாலர் வரை மட்டுமே இருந்தது என்பது குறிப்பிடத்தக்கது.

தற்போது ஃபிஃபா இணையதளத்தில் அனைத்து டிக்கெட்டுகளும் விற்றுத் தீர்ந்துவிட்டன. நுகர்வோர் தேர்வு மையத்தின் (Consumer Choice Center) கொள்கை இயக்குநர் டேவிட் கிளெமென்ட் இது குறித்துக் கூறுகையில், இந்த அளவுக்கு டிக்கெட் விலை உயர இரண்டு முக்கிய காரணங்கள் இருப்பதாகத் தெரிவித்துள்ளார்: டொராண்டோ மற்றும் அதன் சுற்றுவட்டாரப் பகுதிகளில் போர்ச்சுகல் மற்றும் குரோஷியா நாட்டு வம்சாவளியினர் மிக அதிகளவில் வாழ்கின்றனர்.

இது உலகக் கால்பந்து வரலாற்றின் இரு பெரும் ஜாம்பவான்களான கிறிஸ்டியானோ ரொனால்டோ (Cristiano Ronaldo - போர்ச்சுகல்) மற்றும் லூகா மோட்ரிச் (Luka Modrić - குரோஷியா) ஆகியோரின் கடைசி உலகக் கோப்பை போட்டியாக இருக்க வாய்ப்புள்ளது.

இப்போட்டியில் தோற்கும் அணி தொடரிலிருந்து வெளியேறும் என்பதால், ரசிகர்கள் இதனை ஒரு வரலாற்றுத் தருணமாகப் பார்க்கின்றனர்.

"டொராண்டோவில் நடக்கும் டெய்லர் ஸ்விஃப்ட்டின் இசை நிகழ்ச்சியை விட இது பெரியது. ஏனென்றால், ரொனால்டோ மற்றும் மோட்ரிச் மோதும் ஒரு உலகக் கோப்பை நாக்-அவுட் போட்டி இனி வரலாற்றில் எப்போதும் நடக்கப்போவதில்லை" என்று கிளெமென்ட் குறிப்பிட்டுள்ளார்.

அசல் விலையை விட அதிக விலைக்கு டிக்கெட்டுகளை மறுவிற்பனை செய்வதற்கு ஒன்ராறியோ அரசு அண்மையில் தடை விதித்து சட்டம் கொண்டுவந்தது. இருப்பினும், இந்த உலகக் கோப்பை போட்டிக்கு அது தடையாக இருக்கவில்லை.