விண்வெளிக்கு சுற்றுலா செல்ல டிக்கெட் வாங்கிய கனேடிய பெண்மணி

விர்ஜின் நிறுவனத்தின் விண்வெளி சுற்றுலா பயணத்தில் கனேடியர்களுக்கான முதல் குழுவில் வின்னிபெக் பெண்மணி ஒருவர் இடம் பெற்றுள்ளார்.

விர்ஜின் நிறுவனம் மிக விரைவில் விண்வெளி சுற்றுலா முயற்சியை பொதுமக்களுக்காக முன்னெடுக்க உள்ளது. இதன் முதற்கட்ட சோதனை ஓட்டம் நிறுவன ஊழியர்கள் ஐவருடன் ஞாயிறன்று முன்னெடுக்கப்பட்டுள்ளது.

குறித்த திட்டத்தில் வின்னிபெக் பகுதியை சேர்ந்த Judy Anderson என்ற ஓய்வு பெற்ற பல்கலைக்கழக பேராசிரியர் இடம் பெற்றுள்ளார்.

விண்வெளி பயணத்திற்காக 2010ல் இருந்தே பணம் சேமித்து வரும் பேராசிரியர் ஆண்டர்சன், விர்ஜின் நிருவனத்தின் அறிவிப்பால், தமது கனவு நிறைவேற இருக்கிறது என்ற மகிழ்ச்சியில் உள்ளார்.

இதற்காக ஆண்டர்சன் 200,000 அமெரிக்க டொலருக்கு டிக்கெட் வாங்கியுள்ளார். முதற்கட்டமாக 20,000 அமெரிக்க டொலர் செலுத்தப்பட்டுள்ள நிலையில், எஞ்சிய தொகையை புறப்படுவதற்கும் 3 மாதங்களுக்கு முன்னர் செலுத்தினால் போதும் என அவர் தெரிவித்துள்ளார்.

இதனால் இனி உணவுக் கட்டுப்பாடுகளை கடைபிடிக்க வேண்டும் என தெரிவித்துள்ளார் ஆண்டர்சன். ஞாயிறன்று நடந்த சோதனை ஓட்டம் நிகழ்வை ஆண்டர்சன் மொத்தமாக கண்டு களித்துள்ளார்.

1993ல் இருந்தே விண்வெளிக்கு செல்ல வேண்டும் என ஆண்டர்சன் முயற்சி மேற்கொண்டுள்ளார். ஆனால் சந்தர்ப்பம் வாய்க்காமல் அது கனவாகவே இருந்து வந்துள்ளது.

தற்போது விர்ஜின் நிறுவனத்தால் அந்த கனவு நிஜமாக இருப்பதாக அவர் மகிழ்ச்சி தெரிவித்துள்ளார். ஒருமுறை 6 பேர்களை மட்டுமே விர்ஜின் நிறுவனத்தால் விண்வெளிக்கு கொண்டு செல்ல முடியும் என்பதால் டிக்கெட் வாங்கிய பயணிகள் ஆண்டுகள் காத்திருக்க நேரிடும்.

ஆண்டர்சன் 104வது நபராக பதிவாகியுள்ளார். இதனால் விண்வெளி பயணம் எப்போது துவங்கும் என்பதில் தெளிவான தகவல் இல்லை என்றே ஆண்டர்சன் கூறுகிறார்.