கனடாவில் ஈ-பைக் பயன்பாடு அதிகரிப்பு

 மின்சார ஸ்கூட்டர் மற்றும் மின்சார பைக் பயன்பாடு கனடாவில் வேகமாக அதிகரித்து வரும் நிலையில், அவற்றுடன் தொடர்புடைய விபத்துகள், உயிரிழப்புகள் மற்றும் போக்குவரத்து விதிமீறல்களும் கணிசமாக உயர்ந்துள்ளது தீவிர கவலையை ஏற்படுத்தியுள்ளது.

ஹாலிஃபாக்ஸ் நகரின் மையப்பகுதியில் ஈ-ஸ்கூட்டரை வாடகைக்கு எடுத்துப் பயன்படுத்தும் கிறிஸ் மில்லிகன் என்பவர் கூறுகையில், "வெயில் காலத்தில் நடப்பதை விட ஈ-ஸ்கூட்டரில் செல்வது மிகவும் சௌகரியமாகவும், குறைந்த செலவிலுமே அமைகிறது" என்று தெரிவித்தார்.

இருப்பினும், இந்த வசதிக்கு மத்தியில் ஆபத்துகளும் அதிகரித்து வருகின்றன. கனடிய குழந்தை மருத்துவ சங்கம் வெளியிட்டுள்ள சமீபத்திய புள்ளிவிவரங்களின்படி, 2025 ஆம் ஆண்டில் ஈ-ஸ்கூட்டர் விபத்துகளால் 57 பேர் படுகாயமடைந்தனர்.

இதில் 18 வயதுக்குட்பட்ட 10 சிறுவர்கள் உயிரிழந்தனர் என்பது அதிர்ச்சியளிக்கும் தகவலாகும்.

மேலும், கனடிய சுகாதார தகவல் நிறுவனத்தின் தரவுகளின்படி, 2023 முதல் 2024 வரையிலான காலகட்டத்தில் 498 பேர் ஈ-ஸ்கூட்டர் விபத்துகளால் மருத்துவமனையில் அனுமதிக்கப்பட்டுள்ளனர்.

விபத்துகளைக் கட்டுப்படுத்த கனடாவின் பல்வேறு நகரங்கள் தீவிர நடவடிக்கைகளைத் தொடங்கியுள்ளன: டொராண்டோ காவல் துறை நடத்திய இரண்டு வார போக்குவரத்து பாதுகாப்பு பிரச்சாரத்திற்கு முன்பாகவே, ஈ-ஸ்கூட்டர் மற்றும் ஈ-பைக் விதிமீறல்களுக்காக 447 அபராத செல்லான்கள் மற்றும் எச்சரிக்கைகளை வழங்கியுள்ளது.

வரும் இலையுதிர் காலம் (Fall) முதல் 14 வயதுக்குட்பட்ட சிறுவர்கள் ஈ-பைக் ஓட்டுவதற்குத் தடை விதிக்கப்படுவதாக நோவா ஸ்கோஷியா மாகாணம் அறிவித்துள்ளது. 2022 ஆம் ஆண்டிலேயே ஈ-ஸ்கூட்டர்களுக்கு இந்த வயதுக் கட்டுப்பாடு அமல்படுத்தப்பட்டது குறிப்பிடத்தக்கது.

இது குறித்து நோவா ஸ்கோஷியா பொதுப்பணித்துறை அமைச்சர் ஃப்ரெட் டில்லி கூறுகையில், "பாரம்பரிய மிதிவண்டிகளை விட இவை மணிக்கு 30 முதல் 32 கி.மீ அல்லது அதற்கு மேற்பட்ட வேகத்தில் செல்லக்கூடியவை. எனவே இவற்றைக் கையாள கூடுதல் முதிர்ச்சி தேவைப்படுகிறது" என்றார்.

14 வயதுக் கட்டுப்பாட்டுக்கு ஆதரவு தெரிவித்த கிறிஸ் மில்லிகன், "எனக்கும் அந்த வயதில் குழந்தைகள் உள்ளனர்; 14 வயது என்பது சரியான எல்லைதான்" என்றார்.