ஒரு நொடியில் எடுத்த அதிரடி முடிவு ; 91 வயது முதியவரின் உயிரைக் காப்பாற்றிய இளைஞர்
அவுஸ்திரேலியாவின் அடிலெய்டு நகரில், கட்டுப்பாட்டை இழந்து தாறுமாறாகச் சென்ற காரைத் தடுத்து நிறுத்தி, அதில் பயணித்த 91 வயது முதியவரின் உயிரைக் காப்பாற்றிய இளைஞருக்கு பாராட்டுகள் குவிந்து வருகின்றன.
அடிலெய்டு நகரின் ஹாம்ப்ஸ்டெட் வீதியில் வெள்ளை நிற கார் ஒன்று பயணித்துக் கொண்டிருந்தபோது, அது சீராகச் செல்லாமல் வீதியின் வலது மற்றும் இடது புறங்களுக்கு மாறி மாறிச் சென்றுள்ளது. இதனால், பின்னால் வந்த வாகன சாரதிகள் தொடர்ந்து ஒலிப்பான்களை ஒலித்து எச்சரித்துள்ளனர்.

இதனை அவதானித்த ஸ்காட் ஹாலண்ட் என்ற இளைஞர், ஏதோ விபரீதம் நிகழப்போவதை உணர்ந்து, ஏனைய வாகனங்களை முந்திச் சென்று குறித்த காரை நெருங்கியுள்ளார்.
அப்போது, காரின் சாரதி இருக்கையில் 91 வயதுடைய முதியவர் ஒருவர் இருந்ததுடன், அவரால் வாகனத்தைக் கட்டுப்படுத்த முடியாமல் திணறிய நிலையில் பயணித்துள்ளமை தெரியவந்துள்ளது.
நிலைமையின் தீவிரத்தை உணர்ந்த ஸ்காட், உடனடியாகத் தனது காரை முதியவர் பயணித்த காருக்கு முன்னால் கொண்டு சென்று நிறுத்தியுள்ளார்.
இதன்போது, முதியவரின் கார் ஸ்காட்டின் வாகனத்தின் பின்புறத்தில் மோதிய நிலையில் நின்றுள்ளது. இதன் மூலம், முன்னால் இருந்த இரு வீதிகள் பிரியும் பகுதியில் முதியவரின் கார் நுழைவதும், பெரும் விபத்து ஏற்படுவதும் தடுக்கப்பட்டுள்ளது.
இதனையடுத்து, காருக்குள் இருந்த பீட்டர் லடாஸ் என்ற முதியவர் மீட்கப்பட்டு, சிகிச்சைக்காக ராயல் அடிலெய்டு வைத்தியசாலைக்கு கொண்டு செல்லப்பட்டுள்ளார்.
தற்போது அவர் குணமடைந்து வருவதாக அவரது மகள் தெரிவித்துள்ளதாக கூறப்படுகிறது.

இந்நிலையில், முதியவரைக் காப்பாற்றுவதற்காகத் துணிச்சலுடன் செயற்பட்ட ஸ்காட் ஹாலண்ட், பின்னர் அவரை நேரில் சந்தித்து உடல்நலம் குறித்தும் விசாரித்துள்ளார்.
அவரது துணிச்சலான செயலை பொலிஸாரும் தீயணைப்புப் படையினரும் வெகுவாகப் பாராட்டியுள்ளனர்.
மேலும், தெற்கு அவுஸ்திரேலிய மாநிலத்தின் முதலமைச்சர் பீட்டர் மலினாஸ்காஸ், ஸ்காட்டைத் தனிப்பட்ட முறையில் தொலைபேசியில் தொடர்புகொண்டு அவரது மனிதாபிமானச் செயலுக்குப் பாராட்டுத் தெரிவித்துள்ளார்.
தனது உயிரையும் வாகனத்தையும் பொருட்படுத்தாமல், ஆபத்தான சூழ்நிலையில் விரைந்து செயற்பட்டு முதியவரின் உயிரைக் காப்பாற்றிய இளைஞரின் செயல் அவுஸ்திரேலியாவில் பலரது பாராட்டுகளையும் பெற்றுள்ளது.