“4413ஆம் ஆண்டுக்குச் சென்று வந்தேன்” ; டைம் டிராவலர் எனக் கூறும் நபரின் அதிர்ச்சி தகவல்கள்

“டைம் டிராவல் செய்து கி.பி. 4413ஆம் ஆண்டுக்குச் சென்று திரும்பி வந்தேன்” என்று தன்னைத்தானே கூறிக்கொள்ளும் பிரிட்டனைச் சேர்ந்த லூயிஸ் வாக்கர் என்பவரின் நேர்காணல் ஒன்று தற்போது சமூக வலைத்தளங்களில் வேகமாகப் பரவி வருகிறது.

செயற்கை நுண்ணறிவு உள்ளிட்ட அதிநவீன தொழில்நுட்பங்கள் மனிதகுலத்தின் எதிர்காலத்தை எவ்வாறு மாற்றும் என்ற அச்சம் உலகம் முழுவதும் நிலவி வரும் நிலையில், வாக்கர் வெளியிட்டதாகக் கூறப்படும் எதிர்காலம் குறித்த தகவல்கள் பலரது கவனத்தையும் ஈர்த்துள்ளன.

வாக்கரின் கூற்றுப்படி, 1977ஆம் ஆண்டு பிரிட்டன் பாதுகாப்பு அமைச்சகத்தில் பணியாற்றியபோது, ரகசியமாக உருவாக்கப்பட்ட கால இயந்திரம் ஒன்றைச் சோதனை செய்வதற்காக தன்னைத் தேர்வு செய்ததாகத் தெரிவித்துள்ளார்.

அந்த இயந்திரம் வெற்றிகரமாக செயல்படுவதற்கான வாய்ப்பு 50 சதவீதம் மட்டுமே இருப்பதாக விஞ்ஞானிகள் எச்சரித்த போதிலும், சோதனையில் பங்கேற்க தனக்கு பெரும் தொகை வழங்கப்பட்டதாகவும் அவர் கூறியுள்ளார்.

முதலில் தன்னை சுமார் 600 ஆண்டுகள் எதிர்காலத்துக்கு அனுப்ப திட்டமிடப்பட்டிருந்ததாகவும், ஆனால் எதிர்பாராத விதமாக தான் கி.பி. 4413ஆம் ஆண்டில் விழித்தெழுந்ததாகவும் வாக்கர் தெரிவித்துள்ளார்.

4413ஆம் ஆண்டில் கண்விழித்தபோது, ஆள் அரவமற்ற மருத்துவமனை ஒன்றில் இருந்ததாகக் கூறும் வாக்கர், அங்கிருந்து வெளியே வந்தபோது கண்ட காட்சிகள் தன்னை அதிர்ச்சிக்குள்ளாக்கியதாக தெரிவித்துள்ளார்.

தனது தலைக்கு மேலே கார்கள் பறந்து கொண்டிருந்ததாகவும், தெருக்கள் முழுவதும் ரோபோக்கள் காணப்பட்டதாகவும் அவர் கூறியுள்ளார். மேலும், மனிதர்களை மிகவும் குறைவாகவே காண முடிந்ததாகவும், பெரும்பாலான இடங்களில் ரோபோக்களே காணப்பட்டதாகவும் தனது நேர்காணலில் தெரிவித்துள்ளார்.

வாக்கர் கூறியுள்ள மற்றொரு அதிர்ச்சித் தகவலின்படி, 2028ஆம் ஆண்டில் டைம் டிராவல் தொழில்நுட்பம் பொதுமக்களுக்கும் கிடைக்கும் நிலை உருவாகும் என அவர் தெரிவித்துள்ளார்.

இதன் மூலம் எதிர்காலத்தில் ஏராளமானோர் காலப்பயணம் மேற்கொள்ளும் சூழல் உருவாகும் என்றும் அவர் கூறியுள்ளார். ஆனால், அவரது கூற்றுகளில் மிகவும் அதிர்ச்சியூட்டும் பகுதி மனிதகுலத்தின் எதிர்காலம் குறித்த எச்சரிக்கையாகும்.

தொழில்நுட்ப வளர்ச்சி தொடர்ந்து அதிகரித்து, பல்வேறு தொழில்நுட்பங்கள் ஒன்றிணையும் நிலையில், காலப்போக்கில் மனித இனம் அழியும் அபாயம் இருப்பதாக வாக்கர் எச்சரித்துள்ளார்.

அதன் விளைவாக, எதிர்காலத்தில் மனிதர்களுக்குப் பதிலாக ரோபோக்கள் ஆதிக்கம் செலுத்தும் உலக நாகரிகம் உருவாகக்கூடும் என்றும் அவர் கூறியுள்ளார்.

இந்தக் கூற்று, ஏற்கனவே செயற்கை நுண்ணறிவு மற்றும் ரோபோட்டிக்ஸ் வளர்ச்சி குறித்து கவலை தெரிவித்து வரும் பலரிடையே மேலும் பரபரப்பை ஏற்படுத்தியுள்ளது.

எனினும், வாக்கரின் இந்தக் கூற்றுகளை உறுதிப்படுத்த இதுவரை எந்தவொரு நம்பகமான ஆதாரமும் வெளியாகவில்லை.

குறிப்பாக, 1977ஆம் ஆண்டிலேயே பிரிட்டன் பாதுகாப்பு அமைச்சகத்தின் ரகசியத் திட்டத்தின் கீழ் கால இயந்திரம் உருவாக்கப்பட்டதாகவும், அதில் தான் சோதனைக்கு உட்படுத்தப்பட்டதாகவும் அவர் கூறுவது பல்வேறு சந்தேகங்களை எழுப்பியுள்ளது.

மேலும், அவரது நேர்காணலில் முக அடையாளம் மறைக்கப்பட்டிருப்பதும் அவரது கூற்றுகளின் நம்பகத்தன்மை குறித்து கேள்விகளை ஏற்படுத்தியுள்ளது.

டைம் டிராவல் குறித்த கருத்துகள் அறிவியல் மற்றும் புனைகதை உலகில் நீண்டகாலமாக பேசப்பட்டு வந்தாலும், மனிதர்களை கடந்த காலத்திற்கோ எதிர்காலத்திற்கோ அனுப்பி மீண்டும் அழைத்து வரக்கூடிய இயந்திரம் உருவாக்கப்பட்டதாக இதுவரை நிரூபிக்கப்பட்ட அறிவியல் சான்றுகள் இல்லை.

இதனால், லூயிஸ் வாக்கரின் கூற்றுகளை உண்மையாக ஏற்றுக்கொள்வதற்கும், முழுமையாக நிராகரிப்பதற்கும் இடையே சமூக வலைத்தளங்களில் பல்வேறு விவாதங்கள் நடைபெற்று வருகின்றன.

எவ்வாறாயினும், கி.பி. 4413ஆம் ஆண்டில் இருந்து திரும்பி வந்ததாகக் கூறும் ஒருவர், மனிதகுலத்தின் எதிர்காலம் குறித்த நம்பிக்கையான செய்தியை விடுத்துச் செல்லாமல், மனிதர்கள் இல்லாத ரோபோக்களின் உலகம் குறித்த எச்சரிக்கையை வெளியிட்டிருப்பது இந்த நேர்காணலை மேலும் பரபரப்பாக்கியுள்ளது.