சரிவை நோக்கிச் செல்லும் அமெரிக்கா ; பொருளாதாரம் மீண்டும் உயிர் பெறுமா?

அமெரிக்கப் பொருளாதாரத்தின் எதிர்காலப் போக்கை கணிக்கும் முக்கிய குறிகாட்டிகள், கடந்த டிசம்பர் மாதத்தில் சரிவைக் கண்டுள்ளதாக 'Conference Board' தெரிவித்துள்ளது.

இது தொடர்ச்சியாக மூன்றாவது மாதமாக ஏற்பட்டுள்ள வீழ்ச்சியாகும் என சுட்டிக்காட்டப்பட்டுள்ளது. 2025 ஆம் ஆண்டின் இறுதி மாதத்தில் இந்த வணிகக் குறிகாட்டிகள் 0.2% சரிந்தன.

இதற்கு முன்னதாக நவம்பரில் 0.3% வீழ்ச்சியும், ஒக்டோபரில் 0.2% வீழ்ச்சியும் பதிவாகியிருந்தது. எனினும், 2025 இன் முதல் பாதியில் காணப்பட்ட 2.8% வீழ்ச்சியுடன் ஒப்பிடுகையில், இரண்டாம் பாதியில் இந்த சரிவு வீதம் 1.2% ஆகக் குறைந்துள்ளது.

கடந்த ஆண்டில் ஜனாதிபதி டொனால்ட் ட்ரம்ப் விதித்த அதிரடி இறக்குமதி வரி விதிப்புகளால் ஏற்பட்ட நிச்சயமற்ற தன்மை குறைந்து, 2026 இன் ஆரம்பத்தில் பொருளாதாரத் தரவுகள் எதிர்பார்த்ததை விடச் சிறப்பாகவே உள்ளன.

கட்டட அனுமதிப் பத்திரங்களின் அதிகரிப்பு மற்றும் நிதித்துறையின் பங்களிப்பு சாதகமாக இருந்தாலும், நுகர்வோர் எதிர்பார்ப்புகள் பலவீனமாக உள்ளமை மற்றும் உற்பத்தித் துறையில் புதிய குறியீடு சரிந்தமை ஆகியவை வீழ்ச்சிக்கு முக்கிய காரணங்களாகும்" என அந்த சபையின் முகாமையாளர் தெரிவித்துள்ளார்.

அத்துடன் வேலைவாய்ப்பற்றோருக்கான கோரிக்கைகள் அதிகரித்தமையும் இதில் தாக்கம் செலுத்தியுள்ளன.

2025 இன் நான்காம் காலாண்டு மற்றும் 2026 இன் தொடக்கத்தில் பொருளாதார வளர்ச்சி மெதுவாகவே இருக்கும் எனக் கணிக்கப்பட்டுள்ளது.

இந்த ஆண்டு மொத்த உள்நாட்டு உற்பத்தி (GDP) 2.1% ஆக இருக்கும் என எதிர்பார்க்கப்படுகிறது (கடந்த ஆண்டு இது 2.2% ஆகக் கணிக்கப்பட்டிருந்தது).

எனினும், வரிக்குறைப்பு மற்றும் கட்டுப்பாடுகள் தளர்த்தப்பட்டதன் காரணமாக பொருளாதாரம் மீண்டும் புத்துயிர் பெறும் என ஒரு சில பொருளாதார நிபுணர்கள் நம்புகின்றனர்.

மேலும், ஜனவரி மாதத்தில் வீடுகள் விற்பனை 0.8% சரிந்துள்ளது. வட்டி விகிதங்கள் 6% ஐ நெருங்குவதால், சுமார் 5.5 மில்லியன் குடும்பங்கள் கடன் பெறத் தகுதி பெற்றிருந்தாலும், புதிய கொள்வனவாளர்கள் சந்தைக்கு வர இன்னும் காலம் எடுக்கும் எனத் தெரிவிக்கப்பட்டுள்ளது.