லங்காசிறி FM
பெர்லின் பிரைட் பேரணி தாக்குதல் ; சந்தேகநபர் பொலிஸ் துப்பாக்கிச் சூட்டில் உயிரிழப்பு
ஜேர்மனியின் பெர்லின் நகரில் நடைபெற்ற பிரைட் (Pride) பேரணியின் மீது நடத்தப்பட்ட தாக்குதலுடன் தொடர்புடைய சந்தேகநபர், பொலிஸாரின் தேடுதல் நடவடிக்கையின்போது இடம்பெற்ற துப்பாக்கிச் சூட்டில் உயிரிழந்துள்ளதாக ஜேர்மன் ஊடகங்கள் செய்தி வெளியிட்டுள்ளன.
மேற்கு பெர்லினிலுள்ள ஸ்பாண்டாவ் (Spandau) பகுதியில் அமைந்துள்ள தோட்டம் ஒன்றில் மேற்கொள்ளப்பட்ட பொலிஸ் நடவடிக்கையின்போதே இந்த சம்பவம் இடம்பெற்றுள்ளதாக தெரிவிக்கப்பட்டுள்ளது.
உயிரிழந்தவர் அப்துல் பலூத் (Abdul Ballout) என்ற 21 வயதுடைய இளைஞர் என அடையாளம் காணப்பட்டுள்ளார். அவர், பிரைட் பேரணியின் போது மக்கள் கூட்டத்துக்குள் வாகனத்தை செலுத்தியதுடன், கத்தியால் பலரைத் தாக்கியதாகவும் குற்றம் சாட்டப்பட்டிருந்தார்.
இந்தத் தாக்குதலில் பெண் ஒருவர் உயிரிழந்ததுடன், குறைந்தது 29 பேர் காயமடைந்ததாக அதிகாரிகள் தெரிவித்துள்ளனர்.
லெபனான் பின்னணியைக் கொண்ட ஜேர்மன் பிரஜையான அப்துல் பலூத், ஏற்கனவே குற்றப் பின்னணி கொண்டவர் எனவும், ஐஎஸ் தீவிரவாத அமைப்பில் இணைவதற்கு முயற்சித்தவர் எனவும் விசாரணைகளில் தெரியவந்துள்ளதாக தெரிவிக்கப்பட்டுள்ளது.
தாக்குதலைத் தொடர்ந்து, ஜேர்மனியில் பாதுகாப்பு அச்சுறுத்தல் நிலை அதிகரிக்கப்பட்டுள்ளதாக அந்நாட்டு உள்துறை அமைச்சர் தெரிவித்துள்ளார். இதேபோன்ற தாக்குதல்கள் மீண்டும் இடம்பெறுவதற்கான வாய்ப்புகளை நிராகரிக்க முடியாது எனவும் அவர் எச்சரிக்கை விடுத்துள்ளார்.
பிரைட் பேரணியின் கொண்டாட்டத்துக்காக தயாரான பெர்லின் நகரம், எதிர்பாராத வன்முறைச் சம்பவத்தால் அதிர்ச்சியிலும் சோகத்திலும் மூழ்கியுள்ளதாக ஜேர்மன் ஊடகங்கள் குறிப்பிட்டுள்ளன.
புங்குடுதீவு 10ம் வட்டாரம், ஆனைக்கோட்டை, கொழும்பு, Scarborough, Canada
19 Jul, 2026
புலோலி தெற்கு, Melbourne, Australia, Victoria, Australia, Zambia, South Africa, சிம்பாப்பே, Zimbabwe
24 Jul, 2026
