காசாவில் இஸ்ரேலின் தொடர் தாக்குதல்களுக்கு வளைகுடா ஒத்துழைப்பு கவுன்சில் கடும் கண்டனம்
காசாவில் பாலஸ்தீனியர்கள் மீது இஸ்ரேல் நடத்தி வரும் "தொடர்ச்சியான கொடூரமான பயங்கரவாதத் தாக்குதல்களுக்கு" வளைகுடா ஒத்துழைப்பு கவுன்சிலின் (GCC) பொதுச்செயலாளர் ஜாசெம் முகமது அல்புதைவி கடும் கண்டனம் தெரிவித்துள்ளார்.
இஸ்ரேலியப் படைகளின் இத்தகைய தொடர் தாக்குதல்கள், பிராந்தியத்தில் பதற்றத்தைத் தணிப்பதற்கும் ஸ்திரத்தன்மையை ஏற்படுத்துவதற்கும் எடுக்கப்படும் முயற்சிகளைச் சீர்குலைப்பதாக அவர் குறிப்பிட்டுள்ளார்.
மேலும், இது மத்திய கிழக்கில் அமைதி மற்றும் பாதுகாப்பை நிலைநாட்டுவதற்கான வாய்ப்புகளுக்குப் பெரும் அச்சுறுத்தலாக அமைந்துள்ளதாகவும் அவர் சுட்டிக்காட்டியுள்ளார்.
இஸ்ரேலின் இந்த நடவடிக்கைகள் சர்வதேச சட்டங்களை அப்பட்டமாக மீறும் செயலாகும் எனக் கூறியுள்ள அல்புதைவி, இத்தாக்குதல்களை உடனடியாகத் தடுத்து நிறுத்த சர்வதேச சமூகம் தாமதமின்றித் தலையிட்டு உரிய நடவடிக்கை எடுக்க வேண்டும் எனவும் வலியுறுத்தியுள்ளார்.