மனைவியைக் கொன்று உடலைத் துண்டு துண்டாக வெட்டிய கணவனுக்கு தண்டனை

 கனடாவின் நியூ ப்ரான்ஸ்விக் மாகாணத்தில் உள்ள சாக்க்வில் பகுதியில், தனது மனைவியைக் கொடூரமாகக் கொலை செய்து, உடலைத் துண்டு துண்டாக வெட்டிய குற்றத்தை ஒப்புக்கொண்ட கணவனுக்கு நீதிமன்றம் ஆயுள் தண்டனை விதித்துத் தீர்ப்பளித்துள்ளது.

65 வயதான ரோஜர் ஹில்யார்ட் கிராஸ்மேன் என்பவருக்கு இரண்டாம் நிலை கொலைக் குற்றத்துக்காக இந்த ஆயுள் தண்டனை விதிக்கப்பட்டுள்ளது.

மேலும், 24 ஆண்டுகளுக்கு அவர் பிணையில் வெளியே வர முடியாது எனவும் நீதிபதி உத்தரவிட்டுள்ளார். மனித உடலை அவமதித்த குற்றச்சாட்டையும் அவர் ஒப்புக்கொண்டுள்ளார்.

கடந்த 2023 அக்டோபர் 12 அன்று, 59 வயதான மார்லீன் கிராஸ்மேன் பணிபுரியும் திரையரங்கின் மேலாளர், அவர் பணிக்கு வராததால் சந்தேகமடைந்து அவரது வீட்டிற்குச் சென்று பார்த்துள்ளார். வீடு திறந்த நிலையில் இருந்ததால் காவல்துறைக்குத் தகவல் அளித்தார்.

காவல்துறையினர் வீட்டிற்குள் சென்று பார்த்தபோது, மார்லீனின் உடல் பாகங்கள் துண்டிக்கப்பட்டு, வீட்டின் பல இடங்களில் வைக்கப்பட்டிருந்த கொடூரத்தைக் கண்டு அதிர்ச்சியடைந்தனர்: தலை, கை, கண் உள்ளிட்ட உடல் பாகங்கள் தனித்தனியாக துண்டிக்கப்பட்டு வைக்கப்பட்டிருந்தன.

துண்டிக்கப்பட்ட கைக்கு அருகே "நான் உனக்கு ஒரு கை தருகிறேன்" என எழுதப்பட்ட குறிப்பு ஒன்றும் இருந்தது. உடற்கூறாய்வு அறிக்கையில், மார்லீனின் நெஞ்சிலும் வயிற்றிலும் கத்தியால் குத்தப்பட்ட காயங்களால் அவர் உயிரிழந்தது உறுதி செய்யப்பட்டது.

கொலை செய்த அதே நாளில், ரோஜர் காவல் நிலையத்தில் தானாக முன்வந்து சரணடைந்தார். சுமார் 37 ஆண்டுகள் திருமண வாழ்க்கையில் இருந்த அவர்களுக்கு இரண்டு மகன்கள் உள்ளனர்.

தண்டனை விவரம் அறிவிக்கப்பட்ட திங்கள்கிழமை அன்று, ரோஜர் நீதிமன்றத்தில் நேரில் ஆஜராகவில்லை. அவர் நான்காம் கட்ட நிணநீர் புற்றுநோயால் பாதிக்கப்பட்டு மருத்துவமனையில் அனுமதிக்கப்பட்டுள்ளார்.