கனடா விமான நிலைய ஓடுதளங்களில் அதிகரிக்கும் அச்சுறுத்தல்

கனடாவின் விமான நிலைய ஓடுதளங்களில் (Runway) பாதுகாப்பு விதிமீறல்கள் மற்றும் விபத்து அபாயங்கள் அண்மைக்காலமாக அதிகரித்து வருவதாகப் புள்ளிவிபரங்கள் எச்சரிக்கின்றன.

'ரன்வே ஊடுருவல்' (Runway Incursions) எனப்படும்—அனுமதியின்றி ஒரு விமானமோ, வாகனமோ அல்லது நபரோ ஓடுதளத்திற்குள் நுழையும் சம்பவங்கள்—கடந்த 2024-ஆம் ஆண்டில் 639-ஆக உயர்ந்து புதிய உச்சத்தைத் தொட்டுள்ளது.

பெரும் விபத்துகளாக மாறக்கூடிய 'அதி-ஆபத்தான' சம்பவங்களின் எண்ணிக்கை 2018 முதல் ஆண்டுக்கு ஒன்று என்ற அளவில் குறைந்திருந்தாலும், ஒட்டுமொத்த விதிமீறல் சம்பவங்கள் அதிகரித்து வருவது கவலையளிப்பதாக கனடா போக்குவரத்து பாதுகாப்பு வாரியத்தின் (TSB) தலைவர் யோன் மாரியர் தெரிவித்துள்ளார்.

விமானப் போக்குவரத்து அதிகரிப்பு, வான்வழிப் போக்குவரத்து கட்டுப்பாட்டாளர்களின் (Air Traffic Controllers) பற்றாக்குறை மற்றும் டொராண்டோ பியர்சன் போன்ற பெரிய விமான நிலையங்களின் சிக்கலான கட்டமைப்பு போன்றவை இந்த அதிகரிப்பிற்கு முக்கிய காரணங்களாகக் கூறப்படுகின்றன.

2010 முதல் 2024 வரையிலான காலப்பகுதியில் இத்தகைய சம்பவங்களின் விகிதம் இருமடங்காக உயர்ந்துள்ளது.

ஓடுதளங்களில் தெளிவான சமிக்ஞை விளக்குகள், மேம்படுத்தப்பட்ட பெயர்ப் பலகைகள் மற்றும் நவீன தொழில்நுட்பங்களைக் கையாளுவதன் மூலமே விபத்து அபாயங்களைக் குறைக்க முடியும் எனப் பாதுகாப்பு வாரியம் பரிந்துரைத்துள்ளது.

கடந்த மாதம் நியூயார்க் லாகுவார்டியா விமான நிலையத்தில் ஏர் கனடா எக்ஸ்பிரஸ் விமானம் தீயணைப்பு வாகனத்துடன் மோதி ஏற்பட்ட விபத்தைத் தொடர்ந்து, ஓடுதளப் பாதுகாப்பு குறித்த விவாதங்கள் மீண்டும் முன்னுரிமை பெற்றுள்ளன.

"விமானப் பயணம் இப்போதும் பாதுகாப்பானதுதான், ஆனால் ஒரு சிறிய தவறு கூடப் பெரும் பாதிப்பை ஏற்படுத்திவிடும்" என மாரியர் எச்சரித்துள்ளார்.