கனடாவில் 17,000-க்கும் மேற்பட்ட வாகனங்களை திரும்பப் பெறும் டொயோட்டா மற்றும் ஜிஎம் நிறுவனங்கள்!

 என்ஜினில் ஏற்பட்டுள்ள உற்பத்தி குறைபாடு மற்றும் ஏர்பேக் வெடிக்கும் அபாயம் காரணமாக, கனடாவில் 17,000-க்கும் மேற்பட்ட வாகனங்களை உற்பத்தி நிறுவனங்கள் அவசரமாகத் திரும்பப் பெறுவதாக அறிவித்துள்ளன.

டொயோட்டா மற்றும் ஜெனரல் மோட்டார்ஸ் ஆகிய இரு வேறு முன்னணி வாகன உற்பத்தி நிறுவனங்கள் இந்தத் தனித்தனி அறிவிப்பை வெளியிட்டுள்ளன.

என்ஜின்கள் முறையாகத் தயாரிக்கப்படாததால், வாகனம் ஓடிக்கொண்டிருக்கும்போதே திடீரென என்ஜின் பழுதடைந்து நின்றுவிடும் அபாயம் உள்ளதாகக் கூறி டொயோட்டா நிறுவனம் கிட்டத்தட்ட 17,000 வாகனங்களைத் திரும்பப் பெறுகிறது.

என்ஜின் உற்பத்தியின் போது ஏற்பட்ட குறைபாட்டால், அதற்குள் உலோகத் துகள்கள் தங்கியிருக்கலாம். இது என்ஜினின் 'கிராங்க்ஷாஃப்ட் பேரிங்குகளை' சேதப்படுத்தி, என்ஜின் இயங்குவதில் சிக்கலையோ அல்லது வாகனம் ஸ்டார்ட் ஆகாத நிலையையோ உருவாக்கலாம். வாகனம் ஓடும்போது திடீரென வேகம் குறைந்தால் விபத்துகள் ஏற்பட வாய்ப்புள்ளது.

3.4L ட்வின்-டர்போ (Twin-turbo) என்ஜின் கொண்ட 2024 லெக்ஸஸ் ஜிஎக்ஸ் 550 (Lexus GX 550), 2023 மற்றும் 2024 ஆம் ஆண்டு மாடல் லெக்ஸஸ் எல்எக்ஸ் 600 (Lexus LX 600), மற்றும் 2023, 2024 ஆம் ஆண்டின் டொயோட்டா டன்ட்ரா (Toyota Tundra) வாகனங்கள் இதில் அடங்கும்.

இதற்கான பழுதுபார்க்கும் திட்டத்தை நிறுவனம் இன்னும் முழுமையாக இறுதி செய்யவில்லை. எனினும், பாதிக்கப்பட்ட வாகன உரிமையாளர்களை அஞ்சல் மூலம் தொடர்பு கொண்டு சரிசெய்து தரவுள்ளதாக டொயோட்டா தெரிவித்துள்ளது.

வாகனத்தின் பக்கவாட்டு ஏர்பேக்குகள் விபத்து எதுவும் நடக்காத சூழலிலும் திடீரென வெடித்துத் திறக்கக்கூடும் என்பதால், பொதுமக்களின் பாதுகாப்பைக் கருதி 200-க்கும் மேற்பட்ட கனரக வாகனங்களை ஜிஎம் நிறுவனம் திரும்பப் பெறுகிறது.

குறிப்பிட்ட சில டிரக்குகளில் உள்ள ஏர்பேக் இன்ஃப்ளேட்டர்களில் குறைபாடு உள்ளது. இதனால் விபத்து ஏதும் ஏற்படாமலேயே ஓட்டுநர் அல்லது பயணிப் பக்க ஏர்பேக்குகள் திடீரெனத் திறக்கலாம். அப்படி நடக்கும்போது ஏர்பேக்கின் சில பாகங்கள் காருக்குள் இருப்பவர்கள் மீது பலமாகத் தாக்கிக் காயங்களை ஏற்படுத்தக் கூடும்.

2018 செவ்ரோலெட் சில்வராடோ (Chevrolet Silverado), 2019 செவ்ரோலெட் சில்வராடோ எச்டி (Silverado HD), 2018 ஜிஎம்சி சியரா (GMC Sierra) மற்றும் 2019 ஜிஎம்சி சியரா எச்டி (Sierra HD) ஆகிய மாடல்களாகும்.

பாதிக்கப்பட்ட வாகன உரிமையாளர்களுக்கு அஞ்சல் மூலம் தகவல் அனுப்பப்படும். அவர்கள் தங்கள் வாகனங்களை டீலர்ஷிப்பிற்கு எடுத்துச் சென்று, இரு பக்கவாட்டு ஏர்பேக் மாடல்களையும் முற்றிலும் இலவசமாக மாற்றிக் கொள்ளலாம் என தெரிவிக்கப்பட்டுள்ளது.