நீதிமன்றின் அதிரடித் தீர்ப்பு: கஞ்சா பயன்படுத்துபவர்கள் துப்பாக்கி வைத்திருக்கத் தடையில்லை!

அமெரிக்காவில் கஞ்சா பயன்படுத்துபவர்கள் துப்பாக்கி வைத்திருப்பதற்கு விதிக்கப்பட்டிருந்த கூட்டாட்சித் தடையை எதிர்த்து தொடரப்பட்ட வழக்கில், அமெரிக்க உச்ச நீதிமன்றம் வியாழக்கிழமை வரலாற்று முக்கியத்துவம் வாய்ந்த தீர்ப்பை வழங்கியுள்ளது.

துப்பாக்கி உரிமைகளை விரிவுபடுத்தும் நோக்கில் இந்த அதிரடித் தீர்ப்பு அமைந்துள்ளது. டெக்சாஸ் மாகாணத்தைச் சேர்ந்த அலி டேனியல் ஹெமானி என்பவர், சட்டவிரோத போதைப்பொருள் பயன்படுத்துபவர்கள் துப்பாக்கி வைத்திருக்கக் கூடாது என்ற 1968-ஆம் ஆண்டின் சட்டம் அமெரிக்க அரசியலமைப்பின் 2-ஆவது திருத்தத்தை (Second Amendment - துப்பாக்கி வைக்கும் உரிமை) மீறுகிறது என்று வாதிட்டார். இந்த வழக்கில் அனைத்து நீதிபதிகளும் ஒருமனதாக அவருக்கு ஆதரவாகத் தீர்ப்பளித்தனர்.

அரசாங்கத்தின் இந்த வாதத்தை நிராகரித்து தீர்ப்பு எழுதிய நீதிபதி நீல் கோர்சுச் தனது உத்தரவில் குறிப்பிட்டுள்ளதாவது: அபாயகரமானவர்கள் என்று கருதப்படாத போதைப்பொருள் பயனாளிகளிடமிருந்து துப்பாக்கிகளைப் பறிக்கும் அரசாங்கத்தின் அதிகாரத்தை இந்தத் தீர்ப்பு கட்டுப்படுத்துகிறது.

தற்போது அமெரிக்காவின் பாதிக்கும் மேற்பட்ட மாநிலங்களில் கஞ்சா பயன்பாடு சட்டப்பூர்வமாக்கப்பட்டு, மருத்துவ நோக்கங்களுக்காகப் பரவலாகப் பயன்படுத்தப்படுகிறது.

நிலைமை இவ்வாறு இருக்க, கஞ்சா பயன்படுத்தும் லட்சக்கணக்கான அமெரிக்கர்கள் ஆபத்தானவர்கள் என்று அரசாங்கம் பொதுப்படையாகக் கூறுவது முரணானது.

இருப்பினும், இந்தத் தீர்ப்பு போதைக்கு முற்றிலும் அடிமையானவர்கள் (Addicts) அல்லது துப்பாக்கி வைத்திருக்கும் போது போதையில் இருப்பவர்களுக்குப் பொருந்தாது என்றும், அவர்கள் ஆபத்தானவர்கள் என்பதற்கான ஆதாரம் இருந்தால் அரசு தொடர்ந்து நடவடிக்கை எடுக்கலாம் என்றும் அவர் தெளிவுபடுத்தியுள்ளார்.

மற்ற துப்பாக்கி கட்டுப்பாடுகளை எதிர்த்தாலும், 1968-ஆம் ஆண்டின் இந்த குறிப்பிட்ட பழமையான சட்டத்தை ஆதரித்து வந்த அதிபர் டொனால்ட் டிரம்பின் குடியரசுக் கட்சி நிர்வாகத்திற்கு இத்தீர்ப்பு பெரும் பின்னடைவாகக் கருதப்படுகிறது.

இதே சட்டத்தின் கீழ் தான் முன்னாள் அதிபர் ஜோ பைடனின் மகன் ஹண்டர் பைடன் (Hunter Biden), 2018-இல் கோகோயின் போதைக்கு அடிமையாக இருந்தபோது துப்பாக்கி வாங்கியதாகக் குற்றம் சாட்டப்பட்டு குற்றவாளியாக அறிவிக்கப்பட்டார்.

பின்னர் அவரது தந்தை ஜோ பைடன் அவருக்கு மன்னிப்பு வழங்கினார் என்பது குறிப்பிடத்தக்கது. இந்த வழக்கு அமெரிக்க அரசியலில் ஒரு விசித்திரமான கூட்டணியை உருவாக்கியது:

மனித உரிமை அமைப்பான ACLU மற்றும் துப்பாக்கி உரிமைகளுக்காகப் போராடும் தேசிய துப்பாக்கி சங்கம் (NRA) ஆகிய இரு வேறு துருவ அமைப்புகளும், கஞ்சா சட்டப்பூர்வமாக்கல் குழுக்களும் இணைந்து அலி ஹெமானியை ஆதரித்தன.

துப்பாக்கிப் பாதுகாப்புக் குழுக்கள் (Everytown போன்றவை) இந்தத் தடையை நீக்கக் கூடாது என்று வாதிட்டன.

அமெரிக்க உச்ச நீதிமன்றம் கடந்த 2022-ஆம் ஆண்டு துப்பாக்கி உரிமைகளை விரிவுபடுத்தி வழங்கிய முக்கியத் தீர்ப்பைத் தொடர்ந்து, நாடு முழுவதும் துப்பாக்கிச் சட்டங்களுக்கு எதிராகத் தொடரப்பட்ட வழக்குகளின் வரிசையில் இந்தத் தீர்ப்பு மிக முக்கியமான ஒன்றாகப் பார்க்கப்படுகிறது.