நான் பங்குகொண்டதிலேயே சோகமான இறுதிச்சடங்கு இதுதான்... கனடா எல்லையில் பலியான குடும்பம் குறித்து உறவினர் ஒருவர்

கனடா அமெரிக்க எல்லையில், பனியில் உறைந்து பலியான இந்தியக் குடும்பத்தின் இறுதிச்சடங்கு ஞாயிற்றுக்கிழமை நடந்ததாக செய்தி வெளியாகியுள்ளது.

அமெரிக்கா செல்லும் ஆசையில், கனடாவிலிருந்து நடந்தே அமெரிக்காவுக்குள் நுழைய முயன்ற குஜராத்திலுள்ள Dingucha என்ற கிராமத்தைச் சேர்ந்த, ஜகதீஷ் (Jagdish 35), அவரது மனைவி வைஷாலி (Vaishali 33) பிள்ளைகள் விஹாங்கி (Vihanngi 12) மற்றும் தார்மிக் (Dharmik 3) ஆகியோர் சென்ற மாதம் உயிரற்ற உடல்களாக கண்டெடுக்கப்பட்ட சம்பவம் அமெரிக்கா, கனடா மற்றும் இந்தியா ஆகிய நாடுகளில் அதிர்வலைகளை உருவாக்கியது.

இந்நிலையில், ஜகதீஷ் குடும்பத்தின் இறுதிச்சடங்கு ஞாயிற்றுக்கிழமை அமைதியாக வின்னிபெக்கில் நடைபெற்றுள்ளது.

இந்தியாவிலிருந்தும் அமெரிக்காவிலிருந்தும் வந்த 11 குடும்ப உறுப்பினர்கள் மற்றும் வின்னிபெக்கில் வாழும் மூன்று பேர் அந்த இறுதிச்சடங்கில் கலந்துகொண்டுள்ளனர்.

மேலும், இறுதிச்சடங்கை மற்ற உறவினர்களும் நண்பர்களும் பார்க்கும் வகையில் நேரலையில் ஒளிபரப்பும் செய்யப்பட்டுள்ளது.

இதுவரை நான் பங்கேற்றதிலேயே அதிக சோகமான இறுதிச்சடங்கு இதுதான் என்கிறார் வின்னிபெக்கில் வாழும் Bhadresh Bhatt.

ஒரே குடும்பத்தைச் சேர்ந்த நான்கு பேருக்கு, இப்படிப்பட்ட ஒரு சோக சூழலில் இறுதிச்சடங்கு நடத்தப்படுவது கடும் அதிர்ச்சியை ஏற்படுத்தியுள்ளது என்கிறார் Bhadresh Bhatt.

இறுதிச்சடங்கைத் தொடர்ந்து, இந்தியாவில் ஜகதீஷ் குடும்பத்தைச் சேர்ந்த 100க்கும் அதிகமானோர் திங்கட்கிழமை கூடி ஜகதீஷ் குடும்பத்தினரை நினைவுகூரும் வகையில் ஞாபகார்த்த நிகழ்ச்சி ஒன்றை நடத்தியுள்ளார்கள்.

இதற்கிடையில், ஜகதீஷ் குடும்பத்தினரை அமெரிக்காவுக்கு அனுப்பியதின் பின்னணியில் உள்ளது யார் என்பதைத் தெரிவிக்க அவரது குடும்பத்தினர் தயக்கம் காட்டி வருகின்றனர். அது தொடர்பான விசாரணை இன்னமும் தொடர்ந்து நடைபெற்று வருகிறது.