அட்லாண்டிக் கடலில் மாயமான கனடா மருத்துவ விமானம்!

பெர்முடாவில் இருந்து அமெரிக்காவின் போஸ்டன் நகரை நோக்கிச் சென்றபோது அட்லாண்டிக் பெருங்கடலில் மாயமான கனடாவின் ஒன்டாரியோவைச் சேர்ந்த மருத்துவ அவசர ஊர்தி விமானத்தைத் தேடும் பணியை அமெரிக்கக் கடலோரக் காவல் படை ஞாயிற்றுக்கிழமை முறைப்படி நிறுத்தியுள்ளது.

விமானத்தில் இருந்த 6 பேரும் உயிரிழந்திருக்கக் கூடும் என அஞ்சப்படுகிறது.

ஹேமில்டனைத் தளமாகக் கொண்ட 'லேட்டிட்யூட் ஏர் ஆம்புலன்ஸ்' நிறுவனத்தால் இயக்கப்படும் 'ஹார்ட்பீட் 104' என்ற சிறிய ரக விமானத்தில் 4 கனடியர்கள் மற்றும் 2 பெர்முடா நாட்டவர்கள் பயணித்தனர்.

இதில் இரண்டு விமானிகள், இரண்டு மருத்துவ ஊழியர்கள், ஒரு நோயாளி மற்றும் நோயாளியின் உறவினர் ஒருவர் அடங்குவர்.

தேடுதல் பணி நிறைவடைந்ததைத் தொடர்ந்து, "விமானத்திலிருந்த 6 பேரும் உயிரிழந்திருக்கக் கூடும் என்ற இதயத்தை நொறுக்கும் உண்மையை நாங்கள் எதிர்கொள்ள வேண்டியுள்ளது.

இது எங்கள் நிறுவனத்திற்கும், அவர்களின் குடும்பத்தினருக்கும் ஈடுசெய்ய முடியாத இழப்பு" என லேட்டிட்யூட் நிறுவனத்தின் தலைவர் பீட்டர் பைல் தெரிவித்துள்ளார்.

சனிக்கிழமை அதிகாலை 12:41 மணிக்கு பெர்முடாவில் இருந்து புறப்பட்ட இந்த விமானம் போஸ்டன் நோக்கிச் சென்று கொண்டிருந்தபோது, மசாசூசெட்ஸ் மாநிலத்தின் நாண்டக்கெட் கடற்கரைக்கு அருகே அதிகாலை 1:30 மணியளவில் கட்டுப்பாட்டு அறையுடனான தொடர்பை இழந்தது.

விமானம் ரேடாரில் இருந்து மறைவதற்குச் சற்று முன்பு, விமானத்தில் கடுமையான மின்சாரக் கோளாறு ஏற்பட்டதாகவும், 'பார்வையின்றி பறப்பதாகவும்' கூறி விமானி அவசர கால நிலையை அறிவித்ததாகக் கட்டுப்பாட்டு அறை ஒலிப்பதிவுகள் மூலம் தெரியவந்துள்ளது.

ரேடார் தரவுகளின்படி, விமானம் வெறும் 2 நிமிடங்களில் 24,000 அடியிலிருந்து 11,000 அடிக்குக் கீழே அதிவேகமாக இறங்கி, பின்னர் மறைந்துள்ளது. சுமார் 66 மணி நேரம் 7,154 சதுர கிலோமீட்டர் பரப்பளவில் அமெரிக்கக் கடலோரக் காவல் படை, நியூயார்க் விமானப் படை மற்றும் ஹெலிகாப்டர் குழுவினர் தீவிர தேடுதல் வேட்டையில் ஈடுபட்டனர்.

இதன்போது, நாண்டக்கெட் கடற்கரைக்கு அருகே 80 முதல் 90 அடி ஆழமுள்ள கடல் பகுதியில் விமானத்தின் சிதைவுகள் கண்டெடுக்கப்பட்டன.

"தேடுதல் பணியை நிறுத்துவது எளிதான முடிவல்ல. உயிரிழந்தவர்களின் குடும்பத்தினருக்கு எங்கள் ஆழ்ந்த இரங்கலைத் தெரிவித்துக் கொள்கிறோம்" என்று அமெரிக்கக் கடலோரக் காவல் படையின் ரியர் அட்மிரல் மேத்யூ லேக் தெரிவித்துள்ளார்.