அமெரிக்காவில் கோர தாண்டவமாடிய சூறாவளி ; நான்கு பேர் உயிரிழப்பு

அமெரிக்காவின் தென்கிழக்குப் பகுதிகளைத் தாக்கிய இசையாஸ் (Isaias) சூறாவளியால் குறைந்தது நான்கு பேர் உயிரிழந்துள்ளனர்.

குறித்த சூறாவளியால் சுமார் 6 இலட்சத்து 70 ஆயிரம் மின் இணைப்புகள் துண்டிக்கப்பட்டுள்ளதாகத் தெரிவிக்கப்பட்டுள்ளது.

2026 ஒக்டோபர் 10ஆம் திகதி புளோரிடா மாநிலத்தின் டெஸ்டின் (Destin) பகுதிக்கு அருகே கரையைக் கடந்த இந்தச் சூறாவளி, மணிக்கு சுமார் 169 கிலோமீற்றர் வேகத்தில் வீசிய பலத்த காற்றினால் வீடுகள், மின்கம்பங்கள் மற்றும் உட்கட்டமைப்புகளுக்குப் பெரும் சேதத்தை ஏற்படுத்தியுள்ளது.

கரையைக் கடந்த பின்னர் புயல் படிப்படியாக வலுவிழந்தாலும், வெள்ளப்பெருக்கு மற்றும் பலத்த காற்று தொடர்பான அபாயங்கள் நீடித்துள்ளன.

நான்கு பேர் உயிரிழப்பு புயலின் தாக்கத்தினால் புளோரிடா மற்றும் அலபாமா மாநிலங்களில் தலா இருவர் என நான்கு பேர் உயிரிழந்துள்ளதாகத் தகவல்கள் தெரிவிக்கின்றன.

வீடுகளின் மீது மரங்கள் முறிந்து விழுந்ததில் சில உயிரிழப்புகள் ஏற்பட்டுள்ளன. பலத்த காற்றினால் மரங்கள் வேரோடு சாய்ந்ததுடன், மின்கம்பங்களும் சேதமடைந்துள்ளன.

வீதிகளில் மரங்களும் இடிபாடுகளும் குவிந்துள்ளதால் சில பகுதிகளில் போக்குவரத்தும் பாதிக்கப்பட்டுள்ளது.

6.7 இலட்சம் பேர் மின்சாரமின்றி பாதிப்பு புளோரிடா, அலபாமா, ஜோர்ஜியா மற்றும் மிசிசிப்பி ஆகிய மாநிலங்களில் சுமார் 6 இலட்சத்து 70 ஆயிரம் மின் இணைப்புகள் பாதிக்கப்பட்டுள்ளதாகத் தெரிவிக்கப்பட்டுள்ளது.

மின்சார விநியோகத்தை மீளமைப்பதற்காக சுமார் 16 ஆயிரம் மின் ஊழியர்கள் மற்றும் சீரமைப்புப் பணியாளர்கள் தயார்நிலையில் ஈடுபடுத்தப்பட்டுள்ளனர்.

சேதமடைந்த மின்கம்பங்கள் மற்றும் மின் கட்டமைப்புகளைச் சீரமைக்கும் பணிகள் முன்னெடுக்கப்பட்டு வருகின்றன.

விமான நிலையங்கள், வீதிகளுக்கும் பாதிப்பு புளோரிடாவின் பென்சகோலா சர்வதேச விமான நிலையம் உள்ளிட்ட சில விமான நிலையங்களின் சேவைகள் பாதிக்கப்பட்டுள்ளன.

பென்சகோலா விமான நிலையம் புயலால் ஏற்பட்ட சேதங்களைத் தொடர்ந்து வர்த்தக விமானச் சேவைகளுக்காக மூடப்பட்டதாகத் தெரிவிக்கப்பட்டுள்ளது.

மேலும், பலத்த மழை மற்றும் வெள்ளப்பெருக்கு காரணமாகப் பல பகுதிகளில் வீதிப் போக்குவரத்தும் பாதிக்கப்பட்டுள்ளது. சில பகுதிகளில் வெள்ள அபாய எச்சரிக்கைகளும் விடுக்கப்பட்டுள்ளன.

புயலின் தாக்கத்தைத் தொடர்ந்து புளோரிடா மற்றும் அலபாமா மாநிலங்களில் அவசரநிலை தொடர்பான நடவடிக்கைகள் முன்னெடுக்கப்பட்டுள்ளதுடன், பாதிக்கப்பட்ட மக்களுக்கு உதவுவதற்கான மீட்பு மற்றும் நிவாரணப் பணிகளும் இடம்பெற்று வருகின்றன.

அவசரகால எண்ணெய் இருப்பிலிருந்து 40 இலட்சம் பேரல் வெளியீடு புயலால் அமெரிக்காவின் மெக்சிகோ வளைகுடா பகுதியில் எண்ணெய் மற்றும் இயற்கை எரிவாயு உற்பத்தி பாதிக்கப்பட்டுள்ளது.

இதனால் எரிசக்தி விநியோகத்தில் ஏற்படக்கூடிய இடையூறுகளைக் குறைக்கும் நோக்கில், அமெரிக்க எரிசக்தித் திணைக்களம் தனது மூலோபாய அவசரகால எண்ணெய் இருப்பிலிருந்து நான்கு மில்லியன் பேரல் வரையிலான கச்சா எண்ணெயை அவசரகால அடிப்படையில் வழங்குவதற்கு ஒக்டோபர் 10ஆம் திகதி அனுமதி வழங்கியுள்ளது.

இந்த நடவடிக்கை எண்ணெய் சுத்திகரிப்பு நிலையங்களின் செயற்பாடுகளைத் தொடர்ந்து முன்னெடுப்பதற்கும், எரிபொருள் விநியோகத்தில் ஏற்படும் தடைகளைத் தணிப்பதற்கும் மேற்கொள்ளப்பட்டுள்ளதாக அமெரிக்க எரிசக்தித் திணைக்களம் தெரிவித்துள்ளது.

புயல் வலுவிழந்துள்ள போதிலும், வெள்ளப்பெருக்கு, சூறாவளிக் காற்று மற்றும் பிற காலநிலை அபாயங்கள் தொடர்பில் அதிகாரிகள் தொடர்ந்து கண்காணித்து வருகின்றனர்.

பாதிக்கப்பட்ட பகுதிகளில் மின்சாரம் மற்றும் அத்தியாவசிய சேவைகளை வழமைக்குக் கொண்டுவரும் பணிகள் தீவிரமாக முன்னெடுக்கப்பட்டு வருகின்றன.